ރަޝިޔާގެ އާރްޓީ ޓީވީ ޗެނަލް ބްލޮކް ކުރުމަށް ޖަރުމަނުވިލާތުން ނިންމި ނިންމުމާ ދެކޮޅަށް ރައްދުދިނުމުގެ ގޮތުން ރަޝިޔާއިން ވަނީ ޖަރުމަނުވިލާތުގެ ޑޮއިޗޭ ވެލޭއަށް ރަޝިޔާގައި ބްރޯޑްކާސްޓްކުރުން މަނާކޮށްފައެވެ.
ރަޝިޔާގެ ޚާރިޖީ ވުޒާރާގެ ވެބްސައިޓްގައި ލިޔެފައިވާ ބަޔާނެއްގައި ބުނެފައިވަނީ، މޮސްކޯގައި ހުންނަ ޑޮއިޗޭ ވެލޭގެ އޮފީސް ބަންދުކުރުމަށާއި، އެގައުމުގެ ހުރިހާ މުރާސިލުންގެ އެކްރެޑިޓޭޝަންތައް ކެންސަލްކުރުމަށާއި، ރަޝިޔާގައި އެއްވެސް ބާވަތެއްގެ ބްރޯޑްކާސްޓިންގއެއް ނުހިންގުމަށް އެ ޗެނަލަށް އަމުރުކޮށްފައިވާ ކަމަށެވެ.
ރަޝިޔާއިން ބުނެފައި ވަނީ އާރްޓީ ބްލޮކް ކުރުމަށް ނިންމި މަސްއޫލުވެރިންނާއި އެކަމުގައި ބައިވެރިވި އެންމެންގެ މައުލޫމާތު ރަޝިޔާއިން އެއްކުރަމުންދާ ކަމަށެވެ.
