ޕާކިސްތާނުގެ ދަށުގައި އޮންނަ ކަޝްމީރުގެ ރައީސްގެ މަގާމު މިދިޔަ އަހަރުގެ އޮގަސްޓް މަހާ ހަމައަށް ފުރުއްވި މަސްއޫދު ޚާން، ޕާކިސްތާނުގެ ސަފީރުކަމަށް ބަލައިގަތުމަށް އެމެރިކާއިން ލަސްކުރަމުންދާ މައްސަލައިގައި އިންޑިއާގެ އަތެއްވާ ކަމަށް އިސްލާމްއާބާދުން ތުހުމަތު ކުރެއެވެ. ޕާކިސްތާނުން އެމެރިކާއަށް ކަނޑައަޅާފައި ހުންނަވާ އެމްބަސެޑަރުގެ މަގާމަށް މަސްއޫދު ޚާންގެ ނަން ހުށަހަޅާފައި ވަނީ މިދިޔަ ނޮވެމްބަރު މަހުގެ ތެރޭގައެވެ. އަދިވެސް އޭނާ އިންތިޒާރު ކުރައްވަމުން ގެންދަވަނީ ބައިޑަންގެ ސަރުކާރުން އޭނާގެ ނަންފުޅު ގަބޫލުކުރެއްވިކަން ކަށަވަރު ކޮށްދެއްވުމުގެ އިންތިޒާރުގައެވެ.
މަސްއޫދު ޚާންގެ ނަންފުޅު ބަލައިނުގަތުމުގައި އިންޑިއާގެ އަތެއްވާކަމަށް އިސްލާމްއާބާދުން ބުނުމުން ނިއުދިއްލީން ބުނެފައި ވަނީ އެއީ ތާކުންތާކު ޖެހޭ ވާހަކައެއް ނޫން ކަމަށެވެ.
"އެއް ގައުމުން އަނެއް ގައުމަށް ސަފީރަކު އައްޔަން ކުރުން ލަސްވާ ކަމުގެ ޒިންމާ ތިން ވަނަ ގައުމެއްގެ ބޮލުގައި އެޅުވުމަކީ ތާކުންތާކު ނުޖެހޭ ކަމެއް،" މީޑިއާ ބްރީފިންއެއްގައި އެކްސްޓާނަލް އެފެއާޒް މިނިސްޓްރީގެ ތަރުޖަމާނު އަރިންދަމް ބަގްޗީ ވިދާޅުވި އެވެ.
