މި އަހަރުގެ ކޮރޯނާގެ ބަލިމަޑުކަމުގެ ތެރޭގައި އޮންލައިން ޕްލެޓްފޯމްތަކުގައި ޔަހޫދީންނާއި މުސްލިމުންނާ ދެކޮޅު ވާހަކަތައް ވަރަށް ބޮޑަށް ފެތުރިފައިވާ ކަން ހާމަވާ ތަފާސް ހިސާބުތައް ޔޫރަޕިއަން ކޮމިޝަނުން ވަނީ އާންމުކޮށްފަ އެވެ. އދން ނެރެފައިވާ ޚާއްސަ ރިޕީޓްގައި ލިޔުއްވަމުން މުސްލިމް ވަރލްޑް ލީގްގެ ސެކްރެޓަރީ ޖެނެރަލް ޑޮކްޓަރ މުހަންމަދު ބިން އަބްދުލްކަރީމް އަލްއީސާ ވިދާޅުވަނީ އިސްލާމްދީނަށް ނަފްރަތު ކުރާ މީހުންގެ ނިސްބަތް އިންތިހާއަށް އިތުރު ވެގެން ގޮސްފައިވާ ކަމަށެވެ. އަދި މުސްލިމު ވަރލްޑް ލީގުން ވަނީ ނަފްރަތު ނައްތައިލުމަށް އެއްބައިވަންތަ ކަމާއެކު ގުޅިގެން މަސައްކަތް ކުރުމަށް ގޮވާލައިފައެވެ.
ޔޫރަޕްގެ ޖަމާއަތުގެ ޕާލަމެންޓްގެ މަޖައްލާ ދަ ޕާރލަމެންޓްގެ ޚާއްސަ ސަޕްލިމެންޓުގައި މުސްލިމުންނާއި ޔަހޫދީ މުޖުތަމައުތައް ގުޅިގެން މަސައްކަތް ކުރެވިދާނެ ކަމަށް ބުނެ އެކަމަށް ބާރުއަޅާފައި ވެއެވެ. މި މަޖައްލާގައި ބުނެފައި ވަނީ ބިނާކުރަނިވި ސިޔާސަތުތަކެއް އެކަށައަޅައިގެން ނަފްރަތުގެ މިއޮއެވަރަށް ހައްލެއް ހޯދިދާނެ ކަމަށެވެ.
ޔަހޫދީންނާއި މުސްލިމުން ދިރިއުޅޭ މުޖުތަމަޢުތަކަކީ ގިނަ ފަހަރަށް ދެބަސްވުންތައް ގިނަ މުޖުތަމަޢުތަކެއްކަން ފާހަގަ ކުރަމުން ބުނެފައި ވަނީ ދެބަސްވާން ޖެހުނުނަމަވެސް ދެ މުޖުތަމައަށްވެސް ދިމާވާ ގޮންޖެހުންތައް އެއްގޮތް ކަމަށެވެ. ދެ މުޖުތަމައުގައިވެސް ހަރުކަށި ކަނާތު ފިޔައިގެ ކަންކަން އާލާވުމާއި ހައްދުފަހަނައަޅާފައިވާ ވާހަކަތައް އިތުރުވުމާއި، ދީނީ މިނިވަންކަމަށް ހުރަސްތައް އިތުރުވުމުގެ މައްސަލަތައް އާންމު ކަމަށް ބުނެފައި ވެއެވެ.
މުސްލިމު ވަރލްޑް ލީގުން ވަނީ އިސްލާމީފޯބިއާއާ ކުރިމަތިލުމަށްޓަކައި ރިޖެކްޓްހޭޓްގެ ނަމުގައި ހޭޝްޓެގް ކެމްޕޭނެއް ފަށާފައެވެ.
ދުނިޔޭގެ 139 ގައުމެއްގައި 1200 މަޝްހޫރު ދަންނަބޭކަލުންގެ ތާއީދާއެކު، ދީނީ ގޮތުން ނަފްރަތު އުފެއްދުމުގެ ހުރިހާ ޖަރީމާތަކެއް ހުއްޓުވުމަށްޓަކައި ޓެކްނޮލޮޖީގެ ކުންފުނިތަކާއި އޮންލައިން ޕްލެޓްފޯމްތަކަށް އަމާޒުކޮށްގެން ހޭލުންތެރިކަން އިތުރު ކުރުމުގެ ކެމްޕޭނެއް ފަށާފައި ވެއެވެ.
