އުމުރުން ފަސް ރަބީޢުގެ ތުއްތު ރައްޔާން އައުރާމް ފުން ވަޅަކަށް ވެއްޓުނު ހިތާމަވެރި ހާދިސާގައި އޭނާގެ ފުރާނަ ސަލާމަތް ނުކުރެވުނު ކަމަށް މަޣްރިބްގެ މުޙައްމަދު ރަސްގެފާނު ހަވަނަ ވަނީ ރޭ އިއުލާން ކުރައްވާފައެވެ. ރަސްގެފާނު ވަނީ ރައްޔާންގެ މަންމައާއި ބައްޕައާވެސް ފޯނުން ގުޅުއްވައި ތައުޒިޔާ ވިދާޅުވެ ދެ މަފިރިންނަށް ހިތްވަރު ދެއްވާފައެވެ.
މި ހާދިސާ ހަނދާން ކޮށްދެނީ 2019 ވަނަ އަހަރުގެ ކުރީކޮޅު ސްޕެއިންގައި ހިނގި މިފަދަ ހިތާމަވެރި ހާދިސާއެއްގެ ހަނދާންތަކެވެ. އެއިރު އުމުރުން ދެ އަހަރުގެ ޖޯލީން މަރުވީ، ޑައިމީޓަރުގައި 25 ސެންޓިމީޓަރުގެ 100 މީޓަރުގެ ފުން ވަލަކަށް ވެއްޓި ގެނބިގެންނެވެ. އޭނާގެ ހަށިގަނޑު އެ ވަޅުން ނެގުނީ 13 ދުވަސް ވަންދެން އާދަޔާ ޚިލާފު މަސައްކަތެއް ކުރުމަށްފަހުއެވެ.
