"ދަރިންގެ އުފާ" މި ނަމުގައި އިއްޔެ ކެޔޮދޫ ސްކޫލްގެ ފިރިހެން ބެލެނިވެރިން ބޭއްވި ޙަރަކާތަކީ މުޅި ރާއްޖޭގައިވެސް ފާހަގަ ކޮށްލެވޭ ޙަރަކާތެކެވެ.
އިއްޔެ ކެޔޮދޫގެ ބަނދަރު ސަރަޙައްދުގައި ބޭއްވި މި ޙަރަކާތުގެ މަގުޞަދަކީ ކެޔޮދޫގެ ފިރިހެން ބެލެނިވެރިން ދަރިންނާއެކު ވަގުތު ކޮޅެއް ހޭދަކޮށްލުމެވެ. އެ ކުދިންގެ ހިތް އުފާ ކޮށްދިނުމެވެ. ހިތްހަމަޖައަސައިދީ، ކުދިންދެކެ ލޯބިވާކަން ހާމަ ކޮށްދިނުމެވެ. އަދި މިޙަރަކާތް ބޭއްވުމުގެ ބޭނުމުގެ ތެރޭގައި ހުރިހާ ކުޑަކުދިން އެއްތަނެއްގައި ވަގުތު ހޭދަކޮށްލުންވެސް ހިމެނޭކަމަށް ކެޔޮދޫ ސްކޫލުގެ ޕްރިންސިޕަލް ޒައީމާ ހުސެއިން ވިދާޅުވިއެވެ.
މި ހަރަކާތުގައި ކުދިން ގޭމް ކުޅޭނެ ސްޓޯލްތަކާއި ކެއުންތައް ތައްޔާރުކޮށްފައި ހުއްޓެވެ. ޕޭސްޓްރީގެ ބާވަތްތަކާއި މޭވާ ލިބެންހުރި މި ސްޓޯލަތަކުގައި މުޅީންވެސް ޙަރަކާތްތެރިވީ ފިރިހިހެން ބެލެނިވެރިންނެވެ. އަދި މި ޙަރކާތުގައި ފެލިދޫ ޕޮލިސްޓޭޝަނުންނާޢި، ކެޔޮދޫ ޕޮލިސް ޕޯސްޓުންވެސް ބައިވެރިވިއެވެ.
ދަރިންގެ އުފާ ޙަރަކާތުގައި ހުރިހާ ބެލެނިވެރިންވެސް އަދި ދަރިވަރުންވެސް ތިބީ ދިވެހި ސަގާފީ ހެދުމުގައެވެ. މި ޙަރަކާތުގެ ތެރެއިން އިއްޔެ ކެޔޮދޫ ސްކޫލަށް ފިރިހެން ބެލެނިވެރިންގެ ފަރާތުން 7 ޓީވީ ހަދިޔާކުރިއެވެ. އެހެންކަމުން މިހާރު ކެޔޮދޫ ސްކޫލުގައި ޓީވެނެތް އެއްވެސް ކްލާހެއް ނެތްކަމަށް ސްކޫލްގެ ޕްރިންސިޕަލް ވިދާޅުވިއެވެ.
ކެޔޮދޫ ސްކޫލް ފިރިހެން ބެލެނިވެރިންގެ އަމިއްލައަށް ޖަމިއްޔާއެއްވެސް އޮވެއެވެ. މިޖަމިއްޔާއިން ސްކޫލަށް ވަރަށް ގިނަ ގޮތްގޮތުން އެހީވެދެއެވެ. އެގޮތުން މިހާރު އެބެލެނިވެރިން ކުރަމުންދާ މަސައްކަތަކީ ކެޔޮދޫ ސްކޫލުގެ ނޯޓިސް ބޯޑް ޑިޖިޓަލައިޒް ކުރުމެވެ. މި މަސައްކަތުގައިވެސް ހުރިހާ ޚަރަދެއް ކުރަނީ ކެޔޮދޫ ސްކޫލްގެ ފިރިހެން ބެލެނިވެރިންނެވެ.
ކެޔޮދޫ ސްކޫލްގެ ފިރިހެން ބެލެނިވެރިން އެބައިމީހުންގެ ދަރިންނަށްޓަކައި މި ކުރާ މަސައްކަތްތައް އެ ސްކޫލުން ވަރަށް ބޮޑަށް ފާހަގަކުރެއެވެ. އަދި އެކަމަށްޓަކާ ޝުކުރުއަދާކުރެއެވެ. މިއީ ރާއްޖޭގައި ވަރަށް މަދުން ނޫނީ ނު ފެންނަ މަންޒަރެކެވެ. ސްކޫލުތަކުގެ ކަންކަމުގައި ގިނައިން ފެންނަނީ އަންހެން ބެލެނިވެރިންގެ ބައިވެރި ވުމެވެ. ކެޔޮދޫ ސްކޫލްގެ ފިރިހެން ބެލެނިވެރިން މިދައްކަނީ މުޅި ރާއްޖެއަށްވެސް ނަމޫނާއެކެވެ.
