1941 ވަނަ އަހަރު ބޮލީވުޑާ ގުޅުމަށްފަހު ވިދަމުން އައި ތަރި ޝަޝީ ކަޕޫރު ފަސްދޮޅަހުގެ އަހަރުތަކުގެތެރޭގައި ހާލުގައި ޖެހުނުކަމަށް އޭނާގެ ދަރިފުޅު ބުނެފިއެވެ.
ޝަޝީގެ ދަރިފުޅު ކުނާލް މިހެން ބުނެފައިވަނީ ދާދި ފަހުން ދިން އިންޓަވިއެއްގައެވެ. ކުނާލް ބުނީ އޭނާގެ ބައްޕަ އަކީ ބޮލީވުޑްގައި ފިޔަ ޖަހަމުން އައި މުއްސަނދި ސްޓައިލިޝް ތަރިއެއް ކަމަށެވެ. އެހެން ނަމަވެސް ފަސްދޮޅަހުގެ އަހަރުތަކުގެ ތެރޭގައި ބައްޕަ އަށް ބޮލީވުޑުން މަސައްކަތް ލިބޭލެއް މަދު ވުމާ ގުޅިގެން އަތުން ފައިސާހުސްވެ ހާލުގައި ޖެހުނު ކަމަށެވެ. އެހިސާބުން ބައްޕަ ގަނެފައިވާ އަގުބޮޑު ސްޕޯރޓްސް ކަރުތަކާއި އެހެނިހެން ސާމާނު ވިއްކާލީ ކަމަށް ވެސް އޭނާ ބުނެފައިވެއެވެ. ބައްޕަގެ މަންމަ ވެސް އެކަމާ ގުޅިގެން ގޭގެ ބައެއް ތަކެތި ވިއްކަން ޖެހުނުކަމަށް އޭނާ ބުންޏެވެ.
ނަމަވެސް 1971 ވަނަ އަހަރު ބައްޕަގެ ހިޓް ފިލްމް "ޝަރްމީލީ" ރިލީޒް ވުމާއި ގުޅިގެން ފައިސާގެ ދަތި ތަކުން ބައްޕަގެ އާއިލާ ސަލާމަތްވެފައި ވާކަމަށްވެސް އޭނާ ބުންޏެވެ. ޝަޝީ އެންމެ ފުރަތަމަ ފެނިފައިވަނީ ޔަޝްޗޯޕްރާގެ ދަރަމްޕުޓްރާއިން 1961 ވަނަ އަހަރުއެވެ. އެފަހުން އޭނާ ވަނީ ހިޓު އެތައް ފިލްމެއްގައި މަސައްކަތް ކޮށްފައެވެ.
1958 ވަނަ އަހަރު ޝަޝީ ކަޕޫރު ކައިވެނިކޮށްފައިވަނީ ޖެނިފާ ކެންޑަލް ނަމަކަށް ކިޔާ އިނގިރޭސިވިލާތު ފިލްމީ ތަރިއަކާއެވެ. މި ދެމީހުންނަށް 2 ފިރިހެން ކުދިންނާއި އަންހެން ކުއްޖަކު ލިބިފައި ވެއެވެ. 1984 ހަތަރު ވަނަ އަހަރު، އުމުރުން 50 އަހަރުގައި ޖެނިފާ ވަނީ ގޮހޮރުގެ ކެންސަރަށް ފަރުވާ ހޯދަން އިނގިރޭސި ވިލާތަށް ގޮސްފައެވެ. އެގައުމުގައި ފަރުވާ ހޯދަމުން ދަނިކޮށް އޭނާ ވަނީ މަރުވެފައެވެ.
ޝަޝީ ކަޕޫރު މަރުވެފައި ވަނީ 2017 ވަނަ އަހަރު އެވެ. އޭރު އޭނާގެ އުމުރަކީ 79 އަހަރެވެ. ޝަޝީ ކަޕޫރަށް ވަނީ ހަތަރު ނޭޝަނަލް އެވާރޑް ލިބިފައެވެ.
