ޓީވީ އެކްޓަރުން ކަމަށްވާ ގުރުމީތު ޗައުދްރީ އާއި ޑެބީނާ ބޮނާރޖީގެ އަލަތު ދަރިފުޅުގެ ނަން ފުރަތަމަ ފަހަރަށް ހާމަކޮށްފިއެވެ. ދަރިފުޅުގެ މޫނު ނުފެންނަހެން އިންސްޓަގްރާމުގައި ޑެބީނާ ހިއްސާކުރި ފޮޓޯއެއްގައި ލިޔެފައިވަނީ އޭނާގެ ދަރިފުޅަށް ކިޔަފައިވާ ނަމަކީ "ލިއަންނާ" ކަމަށެވެ. މިދެމަފިރިންނަށް ލިބިފައިވަނީ އަންހެން ކުއްޖެކެވެ.
ކައިވެނިކޮށްގެން އުޅޭތާ 9 އަހަރު ފަހުން އަލަތު ދަރިފުޅު ލިބިފައި ފައިވަނީ މިހިނގާ އެޕްރީލްމަހު 3 ވަނަ ދުވަހުއެވެ. ދަރިފުޅުގެ ނަން ހާމަ ކުރި ނަމަވެސް ފޭނުންނަށް ދަރިފުޅުގެ މޫނު ދައްކާނީ އަދި ފަހުންކަމަށް ޑެބީނާ ބުނެފައިވެއެވެ.
ޑެބީނާ އާއި ގުރުމީތަކީ ސޯޝަލް މީޑިއާގައި ވަރަށް އެކްޓިވް ދެމަފިރިންނެވެ. ވިހެއުމަށްފަހު ވެސް ޑެބީނާ ފެންނަނީ ސޯޝަލް މީޑިއާގައި ވަރަށް އެކްޓިވްކޮށް އުޅޭ މީހެއްގެ ގޮތުގައެވެ. ޑެބީނާ އޭނާގެ އަލަތު ދަރިފުޅަށް ހާއްސަ އިންސްޓަގްރާމް އެކައުންޓެއް ހުޅުވައި ދަރިފުޅުގެ ފޮޓޯ ނަމާއެކު ހިއްސާ ކޮށްފައި ވެއެވެ.
މިދެމަފިރިން ބުނެފައިވާގޮތުގައި އާއިލާ އާއި އެކު ދަރިފުޅުގެ 6ދުވަސް ފާހަގަކޮށް މިވަގުތު އެ ދަރިފުޅުގެ ކަންކަމާ އަވަދިނެތި ދެމީހުން އުޅޭކަމަށެވެ.
ފެބްރުއަރީ 2011 ވަނަ އަހަރު ޑެބީނާ އާއި ގުރުމީތު ކައިވެނި ކުރުމަށްފަހު އަނެއްކާ ދެވަނަ ފަހަރަށް 2021 ވަނަ އަހަރު މިދެތަރިން ގެ ކައިވެނި އާކުރުމަށް ކަމަށްބުނެ އަލުން ކައިވެނިކޮށްފައި ވެއެވެ.
ޑެބީނާ އެކްޓުކުރުމުގެ ދާއިރާއާ ގުޅުނީ 1999ވަނަ އަހަރުއެވެ. ގުރުމީތު މިދާއިރާ އާއި ގުޅުނީ 2006ވަނަ އަހަރުއެވެ.
ގުރުމީތާއި ޑެބީނާ ލޯބީގެ ގޮތުން ގުޅުނީ މި ދެތަރިން އެކުގައި ކުޅެމުން އައި ޑްރާމާ "ރަމާ" ގެތެރެއިންނެވެ.
