ސޫރިޔާއަށް ދާ ރަޝިޔާގެ މަތިންދާ ބޯޓުތަކަށް ތުރުކީގެ އެއަރސްޕޭސް ބަންދުކޮށްފިކަމަށް ތުރުކީން ބުނެފިއެވެ. ތުރުކީގެ ޚާރިޖީ ވަޒީރު މައުލޫދު އުޣުލޫ ވިދާޅުވީ މިމަހުން ފެށިގެން ރަޝިޔާގެ ބޯޓުތަކަށް ތުރުކީގެ ވައިގެ ސަރަހައްދު ބަންދުވާނެކަން ވާނީ ރަޝިޔާގެ ޚާރިޖީ ވަޒީރަށް މިދިޔަ މަހު ދަންނަވާފައެވެ. އަދި ފަހުން އެވާހަކަ ވަނީ ރައީސް ޕޫޓިންއަށް ވެސް ދަންނަވާފައެވެ.
ސޫރިޔާގައި ރަޝިޔާއާއި އީރާނުން ތާއީދު ކުރަނީ ސޫރިޔާ ރައީސް ބައްޝާރުލް އަސަދަށެވެ. ތުރުކީން ސަޕޯޓް ކުރަނީ ހަނގުރާމަވެރިންނަށެވެ.
ސޫރިޔާއާއި ތުރުކީގެ ސަރަހައްދާ ކައިރީގައި 2015ގައި ތުރުކީން ރަޝިޔާގެ އަސްކަރީ މަތިންދާބޯޓެއް ވައްޓާލި މައްސަލާގައި ދެގައުމުގެ ގުޅުން ގޯސްވިއެވެ. ނަމަވެސް ފަހުން ގުޅުން ރަގަޅުވާނ ފަށާފައި ވެއެވެ. ތުރުކީން ބުނާ ގޮތުން ރަޝިޔާއަކީ މުހިންމު ސްޓްރިޓިޖިކް ބައިވެރިއެކެވެ.
ތުރުކީން ވަނީ ރަޝިޔާއާއި ޔުކްރެއިންގެ ސުލްހައިގެ މަސައްކަތަށްވެސް އެހީތެރިވެދޭން ފަށާފައެވެ.
އިސްތަންބޫލްގައި ޔުކްރެއިންއާއި ރަޝިޔާގެ ފަރާތުން ސުލްހައަށް ވާހަކަ ދައްކާ ފަރާތްތަކަށް ތުރުކީން މަޝްވަރާއަށް ފަހިކޮށްދެއެވެ. އަދި އަނަޓާލިއާގައި ދެ ގައުމުގެ ޚާރިޖީ ވަޒީރުންވެ މަޝްވަރާއަށް ފަހިކޮށްދެއެވެ. އޭގެ އިތުރުން ދެ ގައުމުގެ ރައީސުންގެ ސަމިޓެއް އިސްތަންބޫލްގައި ބޭއްވުމަށްވެސް ތުރުކީން ދަނީ މަސައްކަތް ކުރަމުންނެވެ.
