ސްރީލަންކާގައި ބޭރު މީހުންނަށް ދިގު މުއްދަތަކަށް ރެޒިޑެންސް ވިސާ ދޫކުރުމުގައި އަމަލުކުރާނެ އޫސޫލެއް އެކުލަވާލައި އަމަލުކުރަން ފަށައިފިއެވެ.
ކޮންޑޮމީނިއަމް ޕްރޮޕަޓީތަކުގައި މަދުވެގެން 75،000 ޑޮލަރު ނުވަތަ އެއަށްވުރެ ބޮޑު އިންވެސްޓްމަންޓެއް ކުރާ ބޭރު މީހުންނާއި ކުންފުނިތަކުގެ ޑިރެކްޓަރުންނާއި އެމީހުންގެ އަނބިން ނުވަތަ ފިރިން އަދި އެމީހުންގެ ދަރިންނަށް 5 އަހަރާއި 10 އަހަރާ ދެމެދު ދިގު މުއްދަތުގެ ރެސިޑެންސް ވިސާ ދޫކުރުމަށް ނިންމައިފިއެވެ. ވިސާ ދިނުމުގެ މުއްދަތު ބަރޯސާވާނީ އިންވެސްޓްކޮށްފައިވާ އެމެރިކާ ޑޮލަރުގެ މިންވަރަށް ބަލާފައެވެ.
ސްރީލަންކާގެ މަރުކަޒީ ބޭންކުން ބަލައިގަންނަ ކޮމާޝަލް ބޭންކެއްގައި މަދުވެގެން 100،000 އެމެރިކާ ޑޮލަރު ޖަމާކުރާ ބޭރު މީހުންނަށް 10 އަހަރަށް ރެސިޑެންސް ވިސާ ދޫކުރެވޭނެ ގޮތަށް 'ގޯލްޑަން ޕެރެޑައިސް ވިސާ ޕްރޮގްރާމް' ތަންފީޒުކުރުމަށްވެސް ނިންމައިފައި ވެއެވެ.
