ޓުއިޓާ ކުންފުނިން 2020ގެ ޖަނަވަރީ މަހު، ހިއުސްޓަންގައި ވަންޓީމުގެ ނަމުން ކުންފުނީގެ ވެރިންނާއި މުވައްޒަފުންގެ މަހާސިންތާއެއް ބެއްވިއެވެ. އެތައް ހާސް މުވައްޒަފުން ބައިވެރިވި މި ހަފުލާގައި އޭރު ޓްވިޓާގެ ސީއީއޯ ޖެކް ޑޯރސީ ވަނީ ސަޕްރައިޒް ގެސްޓަކަށް ދައުވަތު ދޭނެކަމަށް އިއުލަން ކޮށްފައެވެ. މި ސަޕްރައިޒް ގެސްޓަކށްވީ އީލޯން މަސްކެވެ. މީހުން ހަޅޭއްލަވައި އުފަ ފާޅުކުރަމުން ދިޔައެވެ.
މިހާރު މަސްކު ވަނީ ހިއްސާގެ ބާޒާރުގައި ލިސްޓްކޮށްފައި އޮތް ޓުއިޓާ ގަނެ އަމިއްލަ ކުންފުންޏަކަށް ހަދާފައެވެ. މުވައްޒަފުން ބުނަނީ 44 މިލިއަން ޑޮލަރުގެ މިޑީލާ ބެހޭ ގޮތން ކުންފުނީގެ ސީއީއޯ ޕަރާގް އަގަރްވާލް އެމީހުންނަށް މައުލޫމާތު ދީފައި ނުވާ ކަމަށެވެ. އަދި މަސްކު ޓުއިޓާގަނެ، އަމިއްލަ ކުންފުންޏަކަށް ހެދުމުން ދެން ވެގެންދާނެ ގޮތެއް ސާފކޮށްލުމުން އެކަމަށް ޖަވާބުދޭ މީހަކުވެސް ކުންފުނީގައި ނެތް ކަމަށެވެ.
ބެލެވޭ ގޮތުގައި މަސްކު ޓުއިޓާ ގަތުމުގެ ވިޔަފާރި މުއާމަލާތު ނިމެން އަދި ދުވަސްކޮޅެއް ނަގާނެއެވެ. އަދި ބައެއް ފަރާތްތަކުން ލަފާ ކުރާ ގޮތުގައި ފަހަރެއްގައި ކަމެއް ގޯސްކޮށް ގޮސްފިނަމަ، މި ވިޔަފާރި މުއަމަލާތު ރޫޅިގެން ދިއުމަކީވެސް އެކަށީގެންވާ ކަމެކެވެ.
މަސްކު ޓުއިޓާ ގަތުމުން އެއިން ކުރާނެ އަސަރުތަކާ ބެހޭ ގޮތުން އެކި ފަރާތްތަކުން ދިރާސާތައްވެސް ކުރަމުން ދެއެވެ.
އިޒްރޭލުން ބުނިގޮތުގައި އިޒްރޭލާއި ޔަހޫދީންނަށް ފާޑުކިޔުން އަމާޒުވެގެން ޝަކުވާ ކުރުމުން ޓުއިޓާއިން ޚިޔާލު ފާޅުކުރުމުގެ މިނިވަންކަމުގެ ދަށުން ފިޔަވަޅު އަޅަން ފަސްޖެހޭ ކަމަށެވެ. މަސްކު ހަވާލު ވުމުން އެމީހުން ބަލަނީ މިކަން ހައްލުވެގެންދާނެ ކަމަށެވެ.
ޓުއިޓާއަކީ ޗައިނާގައި މަނާކޮށްފައިވާ މީސްމީޑިއާގެ ވަސީލަތެކެވެ. އެކަމަކު އެންމެ ގިނައިން މަސްކުގެ ބެޓެރިން ދުއްވާ ޓެސްލާ ކަރުތައް އުފައްދަނީ ޗައިނާގައެވެ. މަސްކު ޓުއިޓާ ގަތުމުން އެމެޒޮންގެ ވެރިޔާ މަހާސާދާގަރު ޖެފް ބެޒޮސް މަލަމާތުގެ ރާގަކަށް ބުނެފައި ވަނީ ޓުއިޓާ ދެން ޗައިނާއަށް ފަހިވާނެހެން ހީވާކަމަށެވެ.
