ރަޝިޔާގެ ރައީސް ޕޫޓިން ވަނީ ހުޅަނުގެ ގައުމުތަކަށް އައު އިންޒާރެއް ދެއްވާފައެވެ. ޕޫޓިން ވިދާޅުވީ، ޔޫކްރެއިންއަށް އެހީވުމަށް ނިކުންނަ ކޮންމެ ގައުމަކަށްވެސް ހަލުއި އަސްކަރީ ރައްދަކާ ކުރިމަތި ކުރުމަށް ރަޝިޔާ އޮތީ ތައްޔާރަށް ކަމަށެވެ. އަދި ރަޝިޔާގައި މިކަމަށް ބޭނުންވާ ހުރިހާ އާލާތްތަކެއް އެބަހުރި ކަން އެންމެންވެސް ދަންނާނެ ކަމަށް ޕޫޓިން ވިދާޅުވިއެވެ. އިތުރަށް ވިދާޅުވީ އެފަދަ ހަތިޔާރެއް އެހެން ދެވަނަ ބައެއްގެ އަތުގައި ނުހުންނާނެކަންވެސް އެނގޭނެ ކަމަށެވެ. އަދި "ބޭނުން ޖެހިއްޖެ ހާލަތެއްގައި އެތަކެތި ބޭނުން ކުރާނަން،" އޭނާ ވިދާޅުވި އެވެ. އަދި "މިކަމާ ގުޅޭ ހުރިހާ ނިންމުމެއް މިހާރު މިވަނީ ނިންމާފައި." ޕޫޓިން ވިދާޅުވިއެވެ.
އޭނާގެ އެންމެ ފަހުގެ އިންޒާރު މިއައީ، ހުޅަނގުގެ ގައުމުތަކުން ޔޫކްރެއިންއަށް ހަތިޔާރު ދޭނެކަމަށް ބުނެ ޖަރުމަންވިލާތުގައި އެމެރިކާގެ ދިފާއީ ވަޒީރު އިސްވެ ހުންނަވައިގެން ބައްދަލުވުމެއް ބޭއްވި ފަހުންނެވެ.
އެމެރިކާގެ ދިފާއީ ވަޒީރު ލޮއިޑް އޮސްޓިން އިއްޔެ ވަނީ ޔޫކްރެއިން ރަޝިއާ ބަލިކުރުމަށް ދުނިޔެ އެފުށްމިފުށަށް ޖަހާލާނެ ކަމަށް ވިދާޅުވެފައެވެ.
ހުޅަނގުގެ ގައުމުތަކުން ވަނީ ޔޫކްރެއިންއަށް އަސްކަރީ ގޮތުން އެއްބާރުލުން އިތުރުކުރުމުގެ ވަޢުދުތަކާއެކު ބަރުހަތިޔާރު ދޭން ނިންމާފައެވެ. ޖަރުމަނުވިލާތުން 50 އެންޓި-އެއަރކްރާފްޓް ޓޭންކް ފޮނުވާނެކަމަށް އިޢުލާނުކޮށްފައި ވެއެވެ. އަދި ޔޫކްރެއިންއަށް ފައިޓަރ ޖެޓްތައް ފޯރުކޮށްދިނުމަށް އިނގިރޭސި ޚާރިޖީ ވަޒިރު ގޮވާލެއްވިއެވެ. ނަމަވެސް ފަހުން އޭނާ ވިދާޅުވީ އޭނާގެ މަަގްސަދަކީ ޔުކްރެއިންއަށް މަތިދާބޯޓުގެ ސްޕެއަރ ފޮނުވުން ކަމަށެވެ.
ޔޫރަޕްގެ ގައުމުތަކުން ދަނީ އެމީހުން ނިވަލުގައި ތިބެގެން ޔުކްރެއޮންއާ ރަޝިޔާ ތަޅުވަމުން މަސްހަރު ހޫނުކުރުމަށް މަސައްކަތްތައް ކުރަމުންނެވެ.
