ދަރަންޏަށް ލުޔެއް ހޯދުމަށް ޕެކޭޖެއް ހޯދުމަށް އިންޓަނޭޝަނަލް މަނިޓަރީ ފަންޑް އާއެކު ލަންކާއިން މަޝްވަރާކުރުމުގެ އެޑްވާންސް މަރުހަލާގައި އޮތްއިރު، ތެޔޮ އެތެރެކުރުމަށް އެހީތެރިވުމަށް އިންޑިއާއިން ސްރީލަންކާއަށް އިތުރު 500 މިލިއަން ޑޮލަރުގެ އެހީއެއް ދީފިއެވެ.ޗައިނާއިން ވަނީ ސްރީލަންކާއަށް ލުޔެއް ދިނުމަށް ކަންކައްތަކެއް ހުށަހަޅާފައެވެ. ނަމަވެސް ނާޒުކު ފައްތަރެއްގައި އޮތް ދަނޑިވަޅެއްގައި، ސްރީލަންކާގެ ދިފާއުގައި ޗައިނާއިން އެދެވޭ ކަމެއް ކޮށްފައެއް ނުވެއެވެ. އިންޑިއާއިން ކޮލަމްބޯއަށް ދިން 500 މިލިއަން ޑޮލަރުގެ އިތުރު އެހީއަކީ އިންޑިއާއިން ކުރިން ދިން 1.5 ބިލިއަން ޑޮލަރުގެ ކްރެޑިޓްގެ އިތުރު އަދަދެކެވެ.ސްރީލަންކާގެ އިގުތިސޯދީ ހާލަތު ވަރަށް ގޯސް ކަމަށާއި މި ދަތި އުނދަގޫ ދަނޑިވަޅުގައި އިންޑިއާ އާއި ޗައިނާގެ އެހީތެރިކަމަށް ވެސް އެ ގައުމުން ވަނީ އެދިފަ އެވެ.އިންޑިއާއިން މި ދަނޑިވަޅުގައި ހޯދުމަށް ލަންކާއިން އެދުނީ 1 ބިލިއަން ޑޮލަރެވެ. ސްރީލަންކާއިން ޗައިނާގައި އެދިފައި ވަނީ 1 ބިލިއަން ޑޮލަރުގެ ލޯނާއި، 1.5 ބިލިއަން ޑޮލަރުގެ ކްރެޑިޓަށެވެ. ނަމަވެސް "އިންސާނީ އެހީ" ގެ ގޮތުގައި ޗައިނާއިން ދޭނެކަމަށް ބުނީ މަދު އަދަދެކެވެ.
ސްރީލަންކާއަށް މިހާރުން މިހާރަށް ދަރަނީގެ ކަންތައް ހަމަޖެއްސުމަށާއި އިމްޕޯޓް ގެ ކަންކަން ފުރިހަމަ ކުރުމަށް މަދުވެގެން ހަތަރު ބިލިއަން ޑޮލަރު ބޭނުންވެއެވެ.ސްރީލަންކާގެ އާ ފިނޭންސް މިނިސްޓަރު އަލީ ސަބްރީ މިހާރު ގެންދަވަނީ އައިއެމްއެފް، ވޯލްޑް ބޭންކް، ޗައިނާ އަދި ޖަޕާން ހިމެނޭ ގޮތަށް ބައިނަލްއަގުވާމީ މުއައްސަސާތަކާ އެކު މަޝްވަރާތައް ބާއްވަމުންނެވެ.މިހާރު މިކުރެވޭ މަސައްކަތް ކާމިޔާބުވެ، ދެ ބިލިއަން ޑޮލަރުގެ އިންވެސްޓްމަންޓެއް ސެންޓްރަލް ބޭންކަށް އައިސްފި ނަމަ ލަންކާ ރުޕީސްގެ އަގު ދަށަށް ދިއުން ހުއްޓުވައި، އެ ބޭންކް ހަމައަކަށް އެޅުވުމަށް އެހީތެރިވެދޭނެކަމަށް ސްރީލަންކާއިން ދެކެއެވެ. ކޮވިޑް-19 އާއި ޔޫކްރެއިން ހަނގުރާމައިގެ ސަބަބުން ކުރިމަތިވި ދަތިތަކާ ގުޅިގެން ބޭރުގެ ދަރަނީގެ ގޮތުގައި 35.5 ބިލިއަން ޑޮލަރު ދައްކަން ޖެހޭ ކަމަށް ކޮލަމްބޯއިން މިދިޔަ ހަފުތާގައި އިއުލާން ކުރިއެވެ. އެއަށްފަހު އައިއެމްއެފްއާއެކު ބެއިލްއައުޓް ޕެކޭޖެއް ހޯދުމަށް މަޝްވަރާތައް ވަނީ ފަށާފައެވެ.އައިއެމްއެފްގެ މެނޭޖްމަންޓުން ލަންކާގެ ވަފުދާ ބައްދަލުކުރީ ފިނޭންސް މިނިސްޓަރު އަލީ ސަބްރީ އާއި ސެންޓްރަލް ބޭންކް ގެ ގަވަރުނަރު ނަންދަލާލް ވީރަސިންހަ އާއެކު ވޮޝިންޓަންގައެވެ. ލަންކާގެ ވަފުދުން ވަނީ އިގްތިސާދީ ގޮންޖެހުންތައް ހައްލުކުރުމަށް ޕޮލިސީ އެކްޝަންތަކާ ގުޅޭގޮތުން މަޝްވަރާކޮށްފައެވެ.ދަރަނި އަދާކުރުމާއި އެހެނިހެން ކަންކަމަށް ސްރީލަންކާއަށް މިއަހަރު ގާތްގަނޑަކަށް 7 ބިލިއަން ޑޮލަރު އަނބުރާ ދައްކަން ޖެހޭނެއެވެ. ލަންކާއިން އައިއެމްއެފްގައި އެދިފައި ވަނީ 4 ބިލިއަން ޑޮލަރުގެ ޕެކޭޖަކަށެވެ.
