ތުރުކީގެ ރައީސް ރަޖަބް ތައްޔިބު އުރުދުޣާން ދެ ދުވަހުގެ ގުޅުން ރަނގަޅު ކުރެއްވުމުގެ ދަތުރުފުޅެއްގައި ސައުދީ އަރަބިއްޔާއަށް ވަޑައިގެންފިއެވެ. މިއީ 2018 ވަނަ އަހަރު ނޫސްވެރިޔަކު ތުރުކީގައި މަރާލި ހާދިސާއާ ގުޅިގެން އެތައް އަހަރެއް ވަންދެން ދެގައުމުގެ ދެމެދު އުފެދިފައިވާ ނުތަނަވަސްކަމަށްފަހު އުރުދުޣާން ކުރައްވާ ދަތުރުފުޅެކެވެ.
ތުރުކީގެ ލީޑަރުގެ އޮފީހުން ބުނެފައި ވަނީ މި ދަތުރުފުޅަކީ ސަލްމާން ރަސްގެފާނުގެ ދައުވަތަކަށް ކުރައްވާ ދަތުރުފުޅެއް ކަމަށެވެ. އުރުދުޣާން ސަޢޫދީ ރަސްގެފާނާ ބައްދަލުކުރައްވާނީ ޖިއްދާގައެވެ.
ތުރުކީއާއި ސައުދީއަރަބިއްޔާގެ ގުޅުމުގެ ހުރިހާ ކަމެއް އަލުން މުރާޖައާ ކުރެވި، ދެގައުމުގެ ގުޅުން އިތުރަށް ބަދަހިކުރުމުގެ މަގުސަދުގައި އަޅާ ފިޔަވަޅުތަކާ ބެހޭ ގޮތުން މި ބައްދަލު ކުރެއްވުމުގައި މަޝްވަރާ ކުރެވިގެންދާނެ ކަމަށް ތުރުކީން ބުނެފައި ވެއެވެ.
ތުރުކީގެ ފައިސާގެ އަގު ވެއްޓެމުން ދިއުމުގެ ސަބަބުން ދިމާވެފައިވާ ހީނަރުކަމާއެކު ތުރުކީން ދަނީ ވިޔަފާރި ގުޅުން ރަގަޅު ކުރުމަށް މަސައްކަތްތަކެއް ކުރަމުންނެވެ.
އަމިއްލަ އެކަހެރިކަމެއްގައި އޮތުމަށްފަހު، ތުރުކީން ވަނީ މިސްރާއި، ޔޫއޭއީ އަދި އިސްރާއީލާއެކު އޮންނަ ގުޅުން ރަނގަޅު ކުރުމަށް ވެސް މަސައްކަތް ކޮށްފަ އެވެ.
