ކުރިއަށް އޮތް ފަސް އަހަރު ދުވަހުގެ ތެރޭގައި، ފެނުގެ ދަތިކަން ތަހައްމަލު ކުރަމުންދާ ގައުމުތަކުގެ ތެރޭގައި ޕާކިސްތާނު ހިމެނޭނީ ދިހަވަނައިގައި ކަމަށް މީޑިއާ ރިޕޯޓެއްގައި ބުނެފައި ވެއެވެ.
ޕާކިސްތާނުގެ ޑެއިލީ ޖަސާރަތު ނޫހުގައި ޝާއިއުކޮށްފައިވާ ރިޕޯޓުގައިވާ ގޮތުން ކުރިއަށް އޮތް އަހަރުތަކުގައި ޕާކިސްތާނުގައި މީރު ފެނުގެ ހާލަތު ދާނީ ގޯސް ވަމުންނެވެ.
ފެނުގެ މައްސަލަތަކަށް ބާރުއަޅުއްވަމުން ޕާކިސްތާނުން އދއަށް ކަނޑައަޅުއްވާފައި ހުންނަވާ ދާއިމީ މަންދޫބު މުނީރު އަކްރަމް މީގެ ކުރިން ވިދާޅުވީ، ފެނުގެ ދަތިކަން ކުރިމަތިވެފައިވާ ދުނިޔޭގެ ގައުމުތަކުގެ ލިސްޓުގެ އެންމެ ކުރީގައި ޕާކިސްތާނު ހިމެނޭކަމަށް ލަފާކުރެއްވޭ ކަމަށެވެ.
އޭނާ މިފަދައިން ވާހަކަދެއްކެވީ، ދެމެހެއްޓެނިވި ތަރައްޤީގެ ލަނޑުދަނޑި 6 ގައި ހިމެނޭ ސާފު ފެނުގެ މައްސަލައަށް ޙައްލެއް ގެނައުމާ ބެހޭގޮތުން އދގައި ވާހަކަފުޅު ދައްކަވަމުންނެވެ. ފެނުގެ މައްސަލަތަކަށް އަލިއަޅުވާލައްވަމުން އާރީ ނިއުސްއިން ރިޕޯޓްކުރާ ގޮތުގައި މީރު ފެނުގެ ދަތިކަމުގެ ވާހަކަ ދައްކާއިރު ފެނަށް ޖެހޭ ގައުމުތަކުގެ އެންމެ ކުރީގައި އޮތީ ޕާކިސްތާނެވެ.
