އަފްޣާނިސްތާނަކީ އެމެރިކާއިން ގިނަ އަދަދަކަށް ހަތިޔާރުގެ ގޮތުގައި ފައިސާ އަޅާފައިވާ ތަނެކެވެ. އެމެރިކާ ސިފައިން އަފްޣާނިސްތާނުން ފޭބިއިރު، 7.12 ބިލިއަން ޑޮލަރުގެ އަސްކަރީ ސާމާނުތައް ދޫކޮށް ދިޔަކަމަށް އެމެރިކާއިން ބުނެއެވެ. އެމެރިކާއިން އަފްޣާނިސްތާނަށް އަސްކަރީ އެހީ ދިން އިރު، 16 އަހަރު ގެތެރޭގައި 18 ބިލިއަން ޑޮލަރުގެ އަސްކަރީ ސާމާނުތައް އަފްޣާނިސްތާނަށް ދީފައި ވެއެވެ.
އެމެރިކާއިން ފޭބިއިރު މަތިންދާ ބޯޓްތަކާއި، އަސްކަރީ އުޅަނދުތަކާއި ހަތިޔާރާއި، އެނޫންވެސް އަސްކަރީ އާލާތްތައް ހިމެނޭ ގޮތަށް ގިނަބާވަތެއްގެ ސާމާނުތައް އެމެރިކާއިން ދޫކޮށް ދިޔައެވެ.
އެމެރިކާއިން ބުނެފައި ވަނީ މިތަކެތި ނެގުމަށް ނުވަތަ ހަލާކުކޮށްލުމަށްވެސް އެމެރިކާއިން އަފްޣާނިސްތާނަށް ތާލިބާނުން ވެރިކަމުގައި ތިއްބައި ނުދާނެ ކަމަށެވެ.
ކުއްލި ގޮތަކަށް އަވަސް އަރުވާލައިގެން އެމެރިކާއިން އަފްޣާނސްތާނުން ބޭރުވުމުން އެމެރިކާ ދެޕާޓީންވެސް ދަނީ އެއްބަޔަކު އަނެއް ބަޔަކާ ދެކޮޅަށް އިނގިލި ދިއްކުރަމުންނެވެ. ދިފާއީ ވުޒާރާއިން ތައްޔާރު ކުރި ރިޕޯޓެއްގައި ބުނެފައި ވަނީ އެމެރިކާއިން ދޫކޮށް ދިޔަ އަސްކަރީ އާލާތްތަކަށް ޚާއްސަ މަރާމާތާއި ސާމާނުތައް ބޭނުންވާނެ ކަމަށެވެ.
އަފްޣާނިސްތާންގައި އެމެރިކާއިން އަސްކަރީ މަތިންދާބޯޓުތައް ވެސް ދޫކޮށްފައި ވެއެވެ. އަދި މިތަކެތި ވަނީ ބޭނުން ނުކުރެވޭވަރަށް ހަލާކުކޮށްފައި ކަމަށް އެމެރިކާ ސިފައިން ބުނެއެވެ. އޭގެ އިތުރުން 40 ހާސް އަސްކަރީ އުޅަނދުތައްވެސް އެމެރިކާއިން ދޫކޮށް ދިޔައެވެ. އަދި އެމެރިކާއިން ދޫކޮށް ދިޔަ އިތުރު އެހެނިހެން އާލާތްތަކުގެ ތެރޭގައި، ނައިޓް ވިޝަންސްއާއި ސަރވެއިލެންސް ސާމާނާއި، ބަޔޯމެޓްރިކް އިކުއިޕްމަންޓްސްއާއި އެކްސްޕްލޯސިވް ޑިސްޕޯސަލް އިކުއިޕްމަންޓްސް ހިމެނެއެވެ.
އެމެރިކާއިން އަވަސް އަރުވާލައގެން އަފްޣާނިސްތާނުން ފައިބައިގެން ދިޔައީ މިދިޔަ އޮގަސްޓް މަހުގެ 31 ގައެވެ.
