ޕާކިސްތާނު ސަރުކާރުން ވަނީ ޗައިނާ-ޕާކިސްތާނު އެކުވެރިކަން އިތުރަށް ކުރިއެރުވުމަށް ޗައިނާގެ ރައްޔިތުންނާއި، މަޝްރޫއުތަކާއި، އެހެނިހެން މުއައްސަސާތަކަށް ސަލާމަތާއި ރައްކާތެރިކަން ފޯރުކޮށްދޭނެ ކަމަށް ވައުދުވެފައެވެ.
ޕާކިސްތާނުގައި ޖާނު ގޮއްވާލައިގެން ދިން ބޮމުގެ ހަމަލާއެއްގައި ޗައިނާގެ ތިން މީހަކު މަރުވެ، އިތުރު ހަތަރު މީހަކު ޒަހަމްވި މައްސަލަ ތަހުގީގު ކުރާނެ ކަމުގެ ޔަގީންކަންވެސް ޕާކިސްތާނު ސަރުކާރުން ވަނީ ޗައިނާއަށް ދީފައިވާ ކަމަށް ޗައިނާގެ ފޮރިން މިނިސްޓްރީގެ ތަރުޖަމާނު ވަންގް ވެންބިން ވިދާޅުވެއެވެ. ވެންބިން އިތުރަށް ވިދާޅުވީ، ޗައިނާ-ޕާކިސްތާނުގެ އެއްބާރުލުން ދެމެހެއްޓުމަށާއި، އެއްވެސް ބާރެއްގެ ސަބަބުން ދެ ގައުމުގެގުޅުމަށް ހީނަރު ކަމެއް އަޔަ ނުދިނުމަށް ޕާކިސްތާނުން ވަނީ ވައުދުވެފައެވެ.
"އަޅުގަނޑުމެން ގަބޫލުކުރާ ގޮތުގައި ޗައިނާ-ޕާކިސްތާނު އެއްބާރުލުން އަމާންކަމާއި އޮމާންކަމާއެކު ކުރިއަށް ގެންދިޔުމަށް ޕާކިސްތާނުގެ ފަރާތުން ވަރަށް ހަރުދަނާ ފިޔަވަޅުތަކެއް އަޅާނެ،" ތަރުޖަމާނު ވިދާޅުވި އެވެ.
މީގެ ކުރިންވެސް ޕާކިސްތާން ތާލިބާން ޖަމާއަތުން ޗައިނާގެ ބަޔަކު ދަތުރުކުރި ބަހެއް ގޮސްވާލުމުގެ ސަބަބުން ޕާކިސްތާނަށް މަރުގެ ދިޔައިގެ ގޮތުގައި އެތައް ބިލއަން ޑޮލަރެއް ޗައިނާއަށް ދޭން ޖެހުނެވެ.
