)އިންޒާރު!(
މި ޚަބަރާއެކު ހިމަނާފައިވާ ތަޟާމުން އަވަށުގެ ވީޑިއޯއަކީ ހަގީގީ ވީޑިއޯއަކަށް ވެފައި މިއީ ބަލާ މީހުންނަށް ދިގު ދެމިގެންވާ ނުތަވަސަކަމެއް ލިބޭފަދަ އަނިޔާވެރި ވީޑިއޯ އަކަށްވާތީ މި ވީޑިއޯ ނުބެލުން ރަނގަޅުކަމުގައި ބުނަމެވެ. އަދި މި ހޭޝްޓެގް އިތުރަށް ފޮލޯ ނުކުރުމަށް ވެސް އަންގަމެވެ.
++++++
ސޫރިޔާގެ ރައީސް ބައްޝާރުލްއަސަދުގެ ސިފައިންނާއި ރަޝިޔާއިން ގުޅިގެން ހިންގާފައިވާ ގަތުލުއާންމުތައް ކިތަންމެހާވެސް ގިނައެވެ. ނަމަވެސް ސޫރިޔާ މީހުންނަކީ ޔޫކްރެއިން މީޙުން ކަމަށް ނުވުމުން އެވާހަކަ ހުޅަނގުގެ މީޑިއާއަށް މާބޮޑު ބްރޭކިން ސްޓޯރީއަކަށް ނުވެއެވެ.
އިނގިރޭސި ގާޑިއަން ނޫހުން ވަނީ ސޫރިޔާގެ ދިމިޝްގްގެ ތަޟާމުން އަވަށުގައި ހިންގާފައިވާ ގަތުލު އާންމު ރިޕޯޓް ކޮށްފައެވެ. 2013 ވަނަ އަހަރު ހިންގާފައިވާ މި ގަތުލުއާންމަކީ އާންމުމުގެ 41 މީހަކު ސުއާލު ކުރުމަކާ ނުލައި މަރާލައި ވަޅުގަނޑަކަށް ވައްޓާލި ހާދިސާއެވެ.
މި ކަމާ ގުޅިގެން މީހުން މީޙުން ވަނީ ޓުއިޓާގައި އަރަބިން "مجزرة التضامن" ގެ ނަމުން ހޭޝްޓެގެއް ޓްރެންޑް ކޮށްފައެވެ.
މި ވީޑިއޯތަކުން ފެންނަ ގޮތުގައި މަރާލާފައި މީހުން މެރުމުގެ ކުރިން އެމީހުންގެ އަނގަ މަތީގައި ސެޕޯޓޭޕް އަޅާފައި ވެއެވެ. އަދި ކޮންމެ މީހަކުވެސް ޕްލާސްޓިކް ޓައިއެއް ބޭނުން ކޮށްގެން ފަހަތަށް އަތް ބަނދެފައި ވެއެވެ.
އެމީހުން މަރާލާފަ ވައްޓާލާ ވަޅުގަނޑުގެ އަޑީގައި އަޅާފައި ވަނީ ގިނަ އަދަދެއްގެ ކާރު ޓަޔަރުތަކެކެވެ. މި ވަޅުގަނޑަކީ ދެ އިމާރާތް ދޭތެރޭގައި ކޮނެފައިވާ ވަޅު ގަނޑެކެވެ.
ބައެއް މީހުން ދިރި ތިއްބާ ގެންގޮސް ވަޅުގަނޑަށް ވައްޓާލުމަށްފަހު ބަޑި ޖަހަނީއެވެ. އަދި އަނެއް ބައި މީހުން އިމާރާތުގެ މައްޗަށް ގެންގޮސް ބަޑިޖެހުމަށްފަހު ސީދާ ވަޅުގަނޑަށް ވައްޓާލަނީއެވެ.
މިއަނިޔާގެ ޝިކާރައަކަށްވެފައިވާ މީހުންނަކީ ވީޑއޯއިން ފެންނަ ގޮތުން ރީއްޗަށް ހެދުން އަލައިގެން ތިބި މީހުންނެވެ. ހީވަނީ ޓީޗަރުން ނުވަތަ ޕްރޮފެސަރުން ފަދަ ޕްރޮފެޝަންތަކުގައި އުޅޭ ބައެއް ހެންނެވެ.
ތަޟާމުން އަވަށަކީ ސުންނީ މުސްލިމުންގެ އާބާދީއެކެވެ. މި ޖަރީމާ ހިންގާފައިވާ މީހުންނަކީ ސޫރިޔާގެ ވެރިކަން ކުރާ ބައްޝާރުލް އަސަދުގެ އަލަވީ މަޒްހަބުގެ މީހުންނާއި ނުސެއިރީ މަޒުހަބުގެ ބައެއްކަމަށް މިކަމުގެ މައުލޫމާތު ލިބިފައިވާ މީހުން ކިޔައިދީފައި ވެއެވެ. ނުސައިރީންނަކީ މުސްލިމުން ގަބޫލުކުރާ ގޮތުގައި މުސްލިމުންނެއް ނޫނެވެ. ނަމަވެސް އަލަވީންނަކީ ބައެއް ދަންނަބޭކަލުންގެ ގާތު މުސްލިމު ބައެއް ނޫނެވެ.
ގާޑިއަން އިން މި ގަތުލުއާންމާ ބެހޭ ޑޮކިއުމެންޓްރީ ތައްޔާރުކޮށްފައި ވަނީ މި މައުލޫމާތު ލިބުމުން އެއް އަހަރު ދުވަސްވަނދެން މިކަން ދިރާސާ ކުރުމަށްފަހުއެވެ.
މި ޖަރީމާ ހިންގުމުގައި އިސްވެ ހުރީ ބައްޝާރުލް އަސަދުގެ މިލިޓަރީ ސެކިއުރިޓި ޑިވިޜަންގެ ރައީސް އަމްޖަދު ޔޫސުފްއެވެ.
