ޔޫކްރެއިންއާ ދެކޮޅަށް ރަޝިޔާއިން ކުރި ހަނގުރާމައަށްފަހު މޮސްކޯއާ ދެކޮޅަށް ހުޅަނގުން އަޅާފައިވާ ދަތިކުރުމުގެ ފިޔަވަޅުތަކުން ސަލާމަތްވުމަށް އެދި މުއްސަނދި ރަޝިޔާ މީހުންނަށް ދުބާއި ވަނީ އަމާން ތަނަކަށް ވެފައެވެ.
މީގެ ކުރިން ދުވަހަކުވެސް ފެނިފައިނުވާ ފަދަ އަދަދުތަކެއްގައި، ރަޝިޔާގެ ބިލިއަނަރުންނާއި ވިޔަފާރިވެރިން ޔޫއޭއީއަށް އައިސްފައިވާ ކަމަށް، ކުންފުނިތަކުގެ ވެރިން މީޑިއާއަށް މައުލޫމާތު ދެއެވެ.
އެއް ރިޕޯޓެއްގައި ވާގޮތުން 2022 ވަނަ އަހަރުގެ ފުރަތަމަ ތިން މަސް ދުވަހުގެ ތެރޭގައި ދުބާއީގައި ރަޝިޔާއިން ފްލެޓްތައް ގަނެފައިވާ މިންވަރު ވަނީ 67 އިންސައްތަ މައްޗަށް ޖެހިލާފައެވެ.
ޔޫއޭއީއިން ރަޝިޔާއާ ދެކޮޅަށް ދަތިކުރުމުގެ ފިޔަވަޅު އަޅާފައި ނުވެއެވެ. އަދި ރަޝިޔާ މީހުންނަށް ވިސާ ދިނުމަށްވެސް ހުރަސްތަކެއް ކަނޑައަޅާފައެއް ނުވެއެވެ.
ލަފާކުރެވޭ ގޮތުގައި ފާއިތުވި ދެ މަހެއްހާ ދުވަހުގެ ތެރޭގައި ދެ ލައްކަ މީހުން ވަނީ ރަޝިޔާއިން އެހެން ގައުމުތަކަށް ބޭރުވެފައެވެ.
