ގުއަޓިމާލާގެ ރައީސް މަގާމުން އިސްތިއުފާ ދިނުމަށް ގޮވާލައި މުޒާހަރާ ކުރަމުންދިޔަ ބަޔަކު އެގައުމުގެ ޕާލަމެންޓް އިމާރާތުގައި ހުޅުޖަހައިފިއެވެ.
ގުއަޓިމާލާގެ ރައީސް އަލެހަންދްރޯ ގިއަންމަޓީގެ އިސްތިއުފާއަށް ގޮވާލައި އެގައުމުގެ ރައްޔިތުން ގުއަޓިމާލާގެ އެކި ހިސާބުތަކުގައި ގެންދަނީ މުޒާހަރާ ކުރަމުންނެވެ.
ގުއަޓިމާލާ ސިޓީގައި ހުންނަ ޕާލަމެންޓް އިމާރާތުގައި ހުޅުޖެހީ، ވެރިރަށުގައި މުޒާހަރާ ކުރަމުންދިޔަ ގްރޫޕެއްގެ ބައެކެވެ.
މީޑިއާ ރިޕޯޓްތައް ބުނާގޮތުގައި، ޕާލަމެންޓް އިމާރާތުގައި ރޯވި އަލިފާންގަނޑު އިމާރާތުގެ ބޭރަށްވެސް ފެންނާން ހުއްޓެވެ. ނަމަވެސް، އަލިފާން ރޯވެފައިވަނީ ޕާލަމެންޓް އިމާރާތުގެ ބައެއްގައި ކަމަށާއި، މުޅި އިމާރާތަށް އަލިފާން ފެތުރުމުގެ ކުރިން ނިއްވާލާފައިވާ ކަމަށް ވެއެވެ.
ރެޑްކްރޮސްއިން ބުނެފައިވަނީ، ޕާލަމެންޓް އިމާރާތުގައި އަލިފާން ރޯކޮށްލުމުގެ ސަބަބުން، ދުމުގެ އަސަރުކޮށް އެތައްބަޔަކަށް ފަރުވާދޭން ޖެހުނު ކަމަށެވެ.
ޕާލަމެންޓް އިމާރާތުގައި ބަޔަކު ހުޅުޖެހިއިރު، އެ ހިސާބާ މާ ދުރުނޫން ހިސާބެއްގައި ހުރި ސަރުކާރު އޮފީސްތަކުގެ މައި އިމާރާތް ކުރިމަތީގައިވެސް އެތައްސަތޭކަ ބަޔަކު ގެންދިޔައީ ސުލްހަވެރި މުޒާހަރާއެއް ކުރަމުންނެވެ.
އެމީހުން ގޮވަމުންދިޔައީ ރައީސް ވަގުތުން އިސްތިއުފާ ދެއްވުމަށެވެ. އަދި ކޮރަޕްޝަން ހިންގުމަށް ދެން ފުރުސަތު ނުދެވޭނެ ކަމަށެވެ.
ސާޖިކަލް މާސްކާއި އެނޫންވެސް ވަސީލަތްތަކުން މޫނު ނިވާކޮށްގެން ތިބެ އާންމުން ކުރަމުންދިޔަ މުޒާހަރާ ރޫޅާލަން ފުލުހުން މަސައްކަތް ކުރުމުން ފުލުހުންނާއި މުޒާހަރާގެ ބައިވެރިންނަ ދެމެދު ކުރިމަތިލުންތައްވެސް ހިނގާފައި ވެއެވެ. މުޒާހަރާގެ ބައިވެރިންވަނީ ފުލުހުންނާ ދިމާއަށް އޮށްގާ އުކާފައެވެ.
ކުރިމަތިލުމުގެ ތެރޭގައި 50 އަށްވުރެ ގިނަމީހުން ޒަޚަމްވެގެން ހޮސްޕިޓަލަށް ގެންދަން ޖެހުނުއިރު، ފުލުހުން 20 މީހަކު ހައްޔަރު ކުރި ކަމަށް ހަބަރުތައް ބުނެއެވެ.
ގުއަޓިމާލާގެ ރައީސް އަލެހަންދްރޯ ގިއަންމަޓީ ކުރެއްވި ޓްވީޓެއްގައި، ޕާލަމެންޓް އިމާރާތުގައި ހުޅުޖެހި މައްސަލަ ވަރަށް ބޮޑަށް ކުށްވެރި ކުރައްވާފައި ވެއެވެ. އަދި އެކަމުގައި ބައިވެރިވި ހުރިހާ އެންމެނާ ދެކޮޅަށް ގާނޫނީ ފިޔަވަޅު އަޅުއްވާނެ ކަމަށްވެސް ވައުދުވެވަޑައި ގެންފައިވެއެވެ.
ޕާލަމެންޓް އިމާރާތުގައި ބަޔަކު ހުޅުޖެހިއިރު، ޕާލަމެންޓްގައި މިވަގުތު އަޣުލަބިއްޔަތު އޮތީ ސަރުކާރު ހިންގާ ޕާޓީތަކަށެވެ. ޕާލަމެންޓުން 13 ބިލިއަން އެމެރިކާ ޑޮލަރުގެ ބަޖެޓެއް ފާސްކޮށްފައިވަނީ މިހަފްތާ ތެރޭގައެވެ.
އާންމުން ރުޅިއައީ، އަލަށް ފާސްކުރި ބަޖެޓްގައި އުމްރާނީ ތަރައްގީގެ މަޝްރޫއުތައް ހިންގުމަށް ހަމަޖައްސާފައިވާ ފަންޑުތައް ބޮޑެތި ވިޔަފާރި ކުންފުނިތަކަށް ދޭގޮތަށް ކަނޑައެޅާފައި ވުމުންނެވެ.
މިވަރުގެ ބޮޑު ބަޖެޓެއް ފާސްކޮށް މުއްސަނދި ކުންފުނިތަކަށް ފައިސޭ ލިބޭގޮތަށް ހެދިއިރު، ގުއަޓިމާލާގައި ފަގީރުކަންވަނީ އާންމުވެފައެވެ. އެގައުމުގެ އާބާދީގައި ހިމެނޭ އުމުރުން 5 އަހަރުން ދަށުގެ ދެބައިކުޅަ އެއްބައި ކުދިންނަށް ރަނގަޅު ކާނާ ނުލިބެއެވެ.
