ޗައިނާގެ ދެކުނުގެ އަވަށެއްގައި ބާރު ސްޕީޑްގައި ދުއްވާފައި ދިޔަ ރޭލެއް ފުރޮޅާލުމުން އެ ރޭލުގެ ކޮންޑަކްޓަރަކު މަރުވެ، އިތުރު 8 މީހުން ޒަޚަމްވެފައިވާ ކަމަށް ކޮމިއުނިސްޓް ޕާޓީގެ މީޑިއާ ސީސީޓީވީން ރިޕޯޓް ކޮށްފިއެވެ.
ގުއިޒޫ ޕްރޮވިންސްގެ ރޯންގްޖިއާންގް ކައުންޓީއާ ކައިރިވަމުން ދަނިކޮށް ޓްރެކްގައި ހުރި ތަކެއްޗާ ލައިނގަނެ ރޭލު ބަންޑުން ޖަހާލީއެވެ. ހޮނިހިރު ދުވަހުގެ ރޭ ހިނގި މި ހާދިސާ ހިނގާފައި ވަނީ ހެނދުނު 10:30 ގައި ކަމަށް ސީސީޓީވީން ބުންޏެވެ.
ސީސީޓީވީން ބުނި ގޮތުގައި ޓްރެއިން ކޮންޑަކްޓަރު މަރުވީ ހޮސްޕިޓަލުގަ އެވެ. މިހާދިސާގައި ރޭލްވޭގެ މުވައްޒަފަކާއި ހަތް ފަސިންޖަރުންނަށް ވަނީ އެކިވަރުގެ އަނިޔާތައް ލިބިފައެވެ.
ރޭލުގައި ތިބި 136 ފަސިންޖަރުން އަނިޔާއިން ސަލާމަތް ވިއެވެ. އަދި މި ހާދިސާ ތަހުގީގު ކުރަމުންދާ ކަމަށް ސީސީޓީވީން ބުނެއެވެ.
ޗައިނާގެ ހައި-ސްޕީޑް ރޭލް ނެޓްވޯކްގައި 37،900 ކިލޯމީޓަރު (ގާތްގަނޑަކަށް 23،500 މޭލު) ގެ ލައިންތައް ހިމެނެއެވެ. މިއީ ޗައިނާގެ މެގަ ސިޓީތައް ގުޅުވާލަދޭ މައި ނާރެވެ.
ޗައިނާގެ ރެއިލްވޭގައި 2011ން ފެށިގެން މުހިންމު ނުރައްކާތެރި ހާދިސާއެއް ރިޕޯޓް ކޮށްފައެއް ނުވެއެވެ. ޒެޖިއާންގް ޕްރޮވިންސްގެ ވެންޒޫ ކައިރީގައި ބާރު ސްޕީޑްގައި ދުއްވާފައި ދިޔަ ރޭލެއް ލައިގަތުމުން 40 މީހުން މަރުވެ 200 އާ ގާތްކުރާ އަދަދަކަށް މީހުން ޒަހަމްވެފައި ވއެވެ.
