ޓިއަނަމަން މައިދާންގައި ޑިމޮކްރެސީއަށް ގޮވާލި މީހުންނާ ދެކޮޅަށް ޗައިނާއން ހިންގި އަނިޔާވެރިކަމަށް އަހަރު ފުރުން ފާހަގަ ކުރުމަށް ހޮންގ ކޮންގގައި މަސައްކަތް ކުރި މީހުންނާ ދެކޮޅަށް ޗައިނާ ފުލުހުން ބާރުގެ ބޭނުން ކޮށްފިއެވެ. ފުލުހުން ވަނީ ހޮންގްކޮންގްއިން 6 މީހަކު ހައްޔަރުކޮށްފިއެވެ.
މީގެ 33 އަހަރު ކުރިން ޗައިނާގެ ވެރިރަށް ބެއިޖިންގގައި ޒުވާނުން ވަނީ މަގުތަކަށް ނިކުމެ ޑިމޮކްރެސީއަށް އެދި ސިފައިންނާ ކުރިމަތިލާފައެވެ. ހޮންގ ކޮންގގައި މީހުން އާދަވެގެން މި މުނާސަބާ ފާހަގަ ކުރެއެވެ. ނަމަވެސް ޗައިނާއިން ވަނީ އެ ސިޓީގައި މިއަހަރު ޓިއަނަމަންގެ އަހަރީ މުނަސަބާ ފާހަގަ ކުރުމަށް އެއްވެ އުޅުން މަނާކޮށްފަ އެވެ.
ހޮންގްކޮންގްގެ ފުލުހުން ބުނީ ވިކްޓޯރިއާ ޕާކް ކައިރިން ފަސް ފިރިހެނަކާއި އަންހެނަކު ހައްޔަރުކޮށްފައިވާ ކަމަށެވެ. އެ ހަ މީހުން މިހާރު ތިބީ ފުލުހުންގެ ބެލުމުގެ ދަށުގަ އެވެ.
ސޯޝަލް މީޑިއާގައި ހިއްސާކޮށްފައިވާ ބައެއް ފޮޓޯތަކުން ފެންނަ ގޮތުގައި އެ ހޮންކޮންގގައި ފުލުހުން މީހުން ދުރަށް ގެންދާ މަންޒަރު ފެނެ އެވެ. އަދި އެހެން ބަޔަކު ބަލާ ފާސް ކުރަމުން ދިޔަ މަންޒަރު ވެސް ފެނުނެވެ.
އޭގެ އިތުރުން ފުލުހުން ކުއްތާތަކާއެކު ހަވީރުގެ ވަގުތެއްގައި ވިކްޓޯރިއާ ޕާކުގެ ވަށައިގެންވާ ސަރަހައްދު ޕެޓްރޯލް ކުރަމުން ދިޔަ މަންޒަރުވެސް ވަނީ ފެނިފައެވެ.
މި ޕާކްގައި ހޮނިހިރު ދުވަހު މީހުން ވަނީ އެހެން އަހަރު އަހަރު އުއްބައްތި ދިއްލައިގެން ފާހަގަ ކުރާ މުނާސަބާ އެމީހުންގެ މޯބައިލް ފޯނުގެ ޓޯޗުތައް ދިއްލައިގެން ފާހަގަ ކޮށްފައެވެ. ރޮއިޓާސް ނިއުސް އެޖެންސީން ރިޕޯޓުކޮށްފައިވާ ގޮތުގައި ފުލުހުން ވަނީ އާންމުންނަށް އެ ލައިޓްތައް ނިއްވާލުމަށް އިންޒާރުކޮށްފައެވެ. އަދި ފުލުހުން ވަނީ ހުއްދަ ނެތް އެއްވެސް އެއްވުމެއްގައި ބައިވެރިވާނަމަ، ފަސް އަހަރުގެ ޖަލު ހުކުމެއް އަންނާނެ ކަމަށް އިންޒާރު ދީފައެވެ.
