ޗައިނާއާއެކު ޕާކިސްތާނުން ހަދާފައިވާ ޑިއުޓީ ފްރީ އެއްބަސްވުމުގެ ދަށުން ޕާކިސްތާނަށް މިއަހަރު އާމްދަނީގެ ގޮތުގައި 25 ބިލިއަން ރުޕީސްގެ ގެއްލުމެއް ދައްކައިފިއެވެ. ޕާކިސްތާނުން ވަނީ މި ގެއްލުން ފޫ ބެއްދުމުގެ ގޮތުން ޗައިނާއިން އެތެރެކުރާ ޕެޓްރޯލިއަމް ޕްރޮޑަކްޓްސްއަށް ޑުޓީ ނެގުމަށް ނިންމާފައެވެ. ޕާކިސްތާނުން ބުނާ ގޮތުގައި ޗައިނާއިން ޑިއުޓީ ފްރީކޮށް އިމްޕޯޓު ކުރާ މުދަލުގެ ނިސްބަތް ވަނީ 673 ޕަސެންޓަށް އިތުރު ވެގެން ގޮސްފައެވެ. އެއީ ގާތްގަނޑަކަށް 250 ބިލިއަން ރުޕީސްއަށް އިތުރު ވެގެން ގޮސްފައިވާ އިތުރު ވުމެކެވެ.
ހުކުރު ދުވަހު ޕާކކިސްތާންގެ ވަޒީރުންގެ މަޖިލީހުގެ އިކޮނޮމިކް ކޯޑިނޭޝަން ކޮމިޓީން ނިންމާފައި ވަނީ ޗައިނާއިން އިމްޕޯޓް ކުރާ ޕެޓްރޯލިއަމް އުފެއްދުންތަކަށް 10 ޕަސެންޓްގެ އިދާރީ ޓެކްސްއެއް ނަގާ ގޮތަށެވެ.
ޕާކިސްތާނުން ތެލުގެ ބާވަތްތަކަށް ސަބްސިޑީ ދެއެވެ. ނަމަވެސް ޕާކިސްތާންގެ ދަރަނި ބޮޑުވެ، ބޭރުފައިސާ މަދުވަމުން ދިއުމާ ގުޅިގެން ސަރުކާރުން ވަނީ ތެލުގެ ބާވަތްތަކުގެ އަގުތައް ބޮޑު ކޮށްފައެވެ.
