ޗައިނާއާއި ކެނެޑާއާ ދެމެދު ޑިޕްލޮމެޓިކް ނުތަނަވަސްކަން އަނެއްކާވެސް އިތުރުވާން ފަށައިފިއެވެ. ކެނެޑާއިން ތުހުމަތު ކުރަނީ، އުތުރު ކޮރެއާ ކައިރިން ދަތުރުކުރާ މަތިންދާބޯޓްތަކަށް ޗައިނާއިން ފުރައްސާރަ ކުރަމުންދާ ކަމަށެވެ.
ކެނެޑާގެ ސިފައިން ބނާ ގޮތުގައި އުތުރު ކޮރެއާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް މޮނީޓާ ކުރާ މަތިންދާބޯޓްތަކަށް އުތުރު ކޮރެއާ ކައިރިން ޗައިނާއިން ދުއްތުރާ ކުރަމުން ދަނީނަމަ، ސީރިއަސް މައްސަލަތަކާ ކުރިމަތިލާން ޖެހިދާނެއެވެ.
ޗައިނާގެ ޚާރިޖީ ވުޒާރާގެ ތަރުޖަމާން ވިދާޅުވެފައި ވަނީ ދަތިކުރުމުގެ ފިޔަވަޅުތައް ތަންފީޒު ކުރުމުގެ ނަމުގައި އެހެން ގައުމުތަކުގެ ކަނޑުތަކާއި ވައިގެ ސަރަހައްދުގައި އަސްކަރީ ގޮތުން ފާރަވެރި ވުމަށް އދގެ ސަލާމަތީ މަޖިލީހުން އެއްވެސް އިރެއްގައި އެއްވެސް ގައުމަކަށް ހުއްދަ ދީފައި ނުވާނެ ކަމަށެވެ.
