އިނގިރޭސި ވިލާތުގައި ކީރިތި ރަސޫލާގެ ދަރިކަނބަލުން ފާތިމަތުގެފާނަށް ނިސްބަތްކޮށް އުފައްދާ ފައިވާ ފިލްމު މުސްލިމުން އިޖުތިޖާޖު ކުރުމުގެ ސަބަބުން ޔޫކޭގެ ސިނަމާގައި ނައަޅުވާ ގޮތަށް ނިންމައިފއެވެ. ސީން ވަރލްޑުން ބުނީ އެފިލްމު ސިނަމާތަކުގައި ނައަޅުވަން ނިންމީ "މުވައްޒަފުންނާއި ކަސްޓަމަރުންގެ" ސަލާމަތަށްޓަކައި ކަމަށެވެ.
އިނގިރޭސި ވިލާތުގެ ސިނަމާތަކުން "ދަ ލޭޑީ އޮފް ހެވަން" ނުދެއްކުމަށް ނިންމުމުން އެ ފިލްމުގެ އެގްޒެކްޓިވް ޕްރޮޑިއުސަރު ވަނީ މައްސަލަ ޖައްސާފައެވެ. އޭނާ ބުނެފައި ވަނީ ކޭންގައި އެފިލްމު ދައްކާލުމުން މުސްލިމުންނާއި ޣެއިރު މުސްލިމުންވެސް އެމަސައްކަތަށް ގަޔާވި ކަމަށެވެ. ނަމަވެސް ބައެއް ނޭދެވޭ މަންޒްރުތައް ހުންނާކަމަށް އޭނާވެސް އެއްބަސްވެއެވެ.
"ދަ ލޭޑީ އޮފް ހެވަން" އަނބުރާ ގެންދަން ގޮވާލައި 120،000 އަށް ވުރެ ގިނަ މީހުން ޕެޓިޝަނެއްގައި ސޮއިކޮށްފި އެވެ. ބޯލްޓަން މިސްކިތް ކައުންސިލުން މި ފިލްމު ސިފަކޮށްފައިވަނީ "ދީނާއި މުޖުތަމައާ ދެކޮޅަށް ދެވޭ ހަމަލާއެއް" ގެ ގޮތުގަ އެވެ.
އެކަމަކު އިނގިރޭސިވިލާތުގެ ހައުސް އޮފް ލޯޑްސްގެ މެމްބަރު ބެރޮނެސް ކްލެއާ ފޮކްސް ވިދާޅުވީ މި ފިލްމު ސިނަމާގައި ނޭޅުވުމަށް ނިންމި ނިންމުމަކީ "އާޓްއަށް ގެއްލުންހުރި އަދި ހިޔާލުފާޅުކުރުމުގެ މިނިވަންކަމަށް ނުރައްކާތެރި ނިންމުމެއް" ކަމަށެވެ. ޔޫކޭގެ ހެލްތު ސެކްރެޓަރީ ސާޖިދު ޖާވިދު ވިދާޅުވީ އިނގިރޭސި ވިލާތުގައި "މިނިވަން ޚިޔާލުތައް މަނާ ކުރުމުގެ ސަގާފަތާ މެދު ކަންބޮޑުވެވަޑައިގަންނަވާ" ކަމަށެވެ.
