ސްރީލަންކާގެ އެގްރިކަލްޗަރ މިނިސްޓަރ މަހިންދަ އަމަރަވީރާ ވަނީ ކާބޯތަކެތީގެ ރައްކާތެރިކަމާއި، ތިމާވެށި ހިމާޔަތް ކުރުމަށް އިންޑިއާގެ އެހީއަށް އެދިވަޑައިގެންފައެވެ.އިންޑިއާއިން ސްރީލަންކާއަށް ކަނޑައަޅާފައި ހުންނަވާ ސަފީރު ގޯޕާލް ބާގްލޭ ދާދިފަހުން ވަނީ ސްރީލަންކާގެ އެގްރިކަލްޗަރ މިނިސްޓަރާ ބައްދަލުކުރައްވާފައެވެ. މި ބައްދަލުކުރެއްވުން ބާއްވާފައި މިވަނީ، ސްރީލަންކާއަށް ކުރިމަތިވި އިގުތިސާދީ ހީނަރުކަމުގެ ތެރޭގައި، ދަނޑުވެރިކަމުގެ ސިނާއަތުގައި ހުރި މައްސަލަތައް ހައްލުކުރުމަށް އިންޑިއާއިން ސްރީލަންކާއަށް ކެނޑިނޭޅި އެއްބާރުލުން ދެމުން ގެންދާ ދަނޑިވަޅެއްގައެވެ.
މިދިޔަ ހަފުތާގައި އިންޑިއާއިން ވަނީ ސްރީލަންކާއަށް ބޭނުންވާ ޒަރޫރީ ސިއްހީ ސާމާނުގެ ގޮތުގައި ޖުމްލަ 3.3 ޓަނުގެ ސާމާނު ހަވާލުކޮށްފައެވެ.
އިންޑިއާ ހައިކޮމިޝަނުން ބުނީ މިދިޔަ ދެ މަސް ދުވަހުގެ ތެރޭގައި އިންޑިއާ ސަރުކާރާއި ރައްޔިތުން ހަދިޔާކުރި 25 ޓަނަށް ވުރެ ގިނަ ބޭސްފަރުވާގެ ސަމާނާއި ސިއްހީ ސާމާނުގެ އަގު 370 މިލިއަން ސްރީލަންކާ ރުޕީސްއާ ގާތްކުރާ ކަމަށެވެ.
އިންޑިއާއިން ވަނީ 3.5 ބިލިއަން ޑޮލަރުގެ އިގުތިސާދީ އެހީއާއި، ހަނޑުލާއި މިލްކް ޕައުޑަރު، ކުޑަކުދިންގެ ކާނާފަދަ އިންސާނީ އެހީގެ އެހެނިހެން ސާމާނު ސަޕްލައި ކޮށްދީފައެވެ.
އިންޑިއާގެ ބޮޑުވަޒީރު ނަރެންދުރަ މޯދީގެ 'ނެއިބަރހުޑް ފަސްޓް' ސިޔާސަތުގެ ސަބަބުން ދެ ގައުމުގެ ރައްޔިތުންގެ ގުޅުމުގެ ސާބިތުކަން ވަރަށް ބޮޑަށް ދައްކުވައިދެއެވެ.
