ސްރީލަންކާގެ ރައީސް ގޯޓާބަޔަ ރާޖަޕަކްސަ ބްލޫމްބާގް ނިއުސް އޭޖެންސީއަށް ދެއްވި ބަޔާނަށް ޗައިނާއިން ރައްދު ދީފިއެވެ. ސްރީލަންކާގެ އިގްތިސާދީ އަނދަވަޅުގައި ޗައިނާއިން ދޮޅު ބިލިއަން ޑޮލަރުގެ ލޯނަކަށް އެދުނެވެ. ނަމަވެސް ޗައިނާއިން މިއަދާހަމައަށް އެއަށް ޖަވާބެއް ދީފައެއް ނުވެއެވެ.
ޗައިނާއިން ސްރީލަންކާގެ އެދުމަށް ޖަވާބު ދީފައި ނުވާކަމަށް ވިދާޅުވެ ސްރީލަންކާގެ ރައީސް ވިދާޅުވީ ޗައިނާއިން އެގައުމުގެ ސްޓްރެޓީޖިކް ފޯކަސް މިހާރު ދެކުނު އިރުމަތީ އޭޝިއާއާއި އެފްރިކާއަށް ބަދަލުކޮށްފައިވާ ކަމަށް ބެލެވޭ ކަމަށެވެ. އަދި ދެކުނު އޭޝިޔާއަށް އޮންނަ ޝައުޤުވެރިކަން ޗައިނާއިން ކުޑަ ކޮށްފައިވާ ކަމަށެވެ.
ގޯތާބަޔާ ރާޖަޕަކްސަގެ ވާހަކައަށް ރައްދު ދެއްވަމުން ޗައިނާގެ ޚާރިޖީ ވުޒާރާގެ ތަރުޖަމާނު ޒާއޯ ލިޖިއާން ބެއިޖިންގައި މީޑިއާއަށް މައުލޫމާތު ދެއްވަމުން ވިދާޅުވީ ޒަމާންވީ ރަހުމަތްތެރި އަވަށްޓެރި ގައުމެއްގެ ހައިސިއްޔަތުން ޗައިނާއިން ސްރީލަންކާއަށް ކުރިމަތިވާ ދަތިތަކާއި ގޮންޖެހުންތަކަށް ވަރަށް ބޮޑު ސަމާލުކަމެއް ދޭކަމަށެވެ. އަދި ޗައިނާގެ ގާބިލުކަން ތަންދިން މިންވަރަކުން ސްރީލަންކާގެ އިޖްތިމާއީ އަދި އިގްތިސޯދީ ކުރިއެރުމަށް އެހީތެރިކަން ފޯރުކޮށްދީފައިވާ ކަމުގައި ވިދާޅުވިއެވެ. ޗައިނާއިން ވަނީ ސްރީލަންކާއަށް 500 މިލިއަން ރެމިމްބީގެ އަގުހުރި އިމަޖެންސީ އަދި އިންސާނީ އެހީ ފޯރުކޮށްދޭނެކަން ހާމަކޮށްފައެވެ. މިއިން އަދި ސްރީލަންކާއަށް ލިބުނީ ފުރަތަމަ ޝިޕްމެންޓެވެ.
އައިއެމްއެފްގެ ބެއިލްއައުޓު ޕެކޭޖެއް ހޯދުމަށް ލަންކާއިން އައިއެމްއެފްއާއެކު މަޝްވަރާތައް ފެށުމުން ޗައިނާ ވަނީ ނުރުހިފައެވެ.
