ޕާކިސްތާން ބަނގުރޫޓުވެއްޖެ! މިއީ ޕާކިސްތާނުގެ ފެޑެރަލް ބޯޑް އޮފް ރެވެނިއު ގެ ކުރީގެ ޗެއަރމަން ޝއްބާރު ޒައިދީ ވިދާޅުވި ވާހަކައެވެ. މިއީ މިހާރު ޕާކިސްތާންގައި އިންފްލޭޝަން މަތިވެ، ފައިސާ ދަތިވެ، ނާޒުކު ސިޔާސީ މާހައުލެއް ކުރިމަތިވެ ޕާކިސްތާނުގެ ޑިފޯލްޓްވުމުގެ ތުންފަތް މަތީގައި އޮތުމުން އެކަމަށް އިޝާރާތް ކޮށް ވިދާޅުވި ހަގީގީ ވާހަކަތަކެވެ.
ޕާކިސްތާންގައި ތެލުގެ އަގު ރެކޯޑް މިންވަރަކަށް މައްޗަށް ގޮސް މިދިޔަ ފަސް މަސް ދުވަހުގެ ތެރޭގައި ތެލުގެ އަގު ވަނީ ދެ ގުނަ އަށް އުފުލިފަ އެވެ. ޕާކިސްތާނުގައި ޕެޓްރޯލާއި ޑީސަލްގެ އަގަށް ވަނީ ޕާކސްތާން 60 ރުޕީސް އިތުރު ވެގެން ގޮސްފައެވެ.
ކާބޯތަކެތީގެ އަގުތައްވެސް އާންމު ރައްޔިތު މީހާއަށް އަތް ނުފޯރާ ފަށަށް އަރަމުންދާ ކަމަށް ބުނެއެވެ. ޖޫން މަހުން ފެށިގެން ސަރުކާރުން ވަނީ ގިތެޔޮގެ އަގުވެސް ދެ ގުނައަށް ވުރެން ބޮޑު ކޮށްފައެވެ. އެއީ ޕާކިސްތާން ރުޕީސް 208 އިން މިހާރު ވަނީ 555 އަށް މަތިކޮށްފަ އެވެ. ހަމައެފަދައިން ކުކިން އޮއިލްގެ އަގުތައްވެސް ދެ ގުނައަށް ބޮޑު ވެފައި ވެއެވެ.ފާއިތުވި ހަ މަސް ދުވަހުގެ ތެރޭގައި ޕާކިސްތާނުން ވަނީ ކާށި ތެލާއި ގިތެޔޮގެ އަގުތައް 300 ޕަސެންޓް އިތުރުވެފަ އެވެ.
ކަރަންޓަށްވެސް ދިމާވެފައި ވަނީ ވަރަށް ހިތް ދަތި ގޮތެކެވެ. ކަރަންޓު އުފައްދާ އަމިއްލަ ކުންފުނިތައް ކަމަށްވާ ޗައިނާގެ އިންވެސްޓަރުންގެ ކުންފުނިތަކަށް ފައިސާ ނުދެއްކުމުން އެމީހުން ދަނީ ކަރަންޓު ކަނޑާލުމުގެ އިންޒާރު ދެމުންނެވެ. އުމްރާނީ ސަރަހައްދުތަކާއި، ރަށްފުށު ހިސާބުތަކަށް 12 ގަޑިއިރަށް ކަރަންޓް ކެނޑުމުގެ މައްސަލަ ކުރިމަތިވެފައި ވެއެވބައެއް ކުދި އިންޖީނުގެތައް ބަންދުކޮށްފައިވަނީ ލިބެންޖެހޭ ތަކެއްޗަށް ކްލިއަރެންސް ނުލިބުމުގެ ސަބަބުންނެވެ. ކަރަންޓް ލޯޑްޝެޑިންގގެ ސަބަބުން ބައެއް ބޮޑެތި ސިޓީތަކުގައިވެސް ފެނުގެ މައްސަލަ ކުރިމަތިވެފައި ވެއެވެ. އެއްކަމަކުން އަނެއް ކަމެއް ކުރިމަތިވެފައި ވެއެވެ.
ޖިއޮޕޮލިޓިކަލް ނުތަނަވަސްކަމާއި، އިންފްލޭޝަންގެ ސަބަބުން ޕާކިސްތާނަށް ހަކަތަ އިމްޕޯޓް ކުރުމުގެ ހަރަދު މިދިޔަ 10 މަސް ދުވަހުގެ ތެރޭގައި ވަނީ ދެގުނަ އަށް އިތުރުވެފަ އެވެ. ހަމައެއާއެކު ޕާކިސްތާންގެ ޓްރޭޑް ޑެފިސިޓް މިހާރު ވަނީ 45 ބިލިއަން ޑޮލަރަށް އަރާފައެވެ. އަދި މިދިޔަ އަހަރުގެ އޮގަސްޓް މަހުން ފެށިގެން ފޮރިން އެކްސްޗޭންޖް ރިޒާވް ވަނީ 10 ބިލިއަން ޑޮލަރަށް ދަށްވެފަ އެވެ.
ކަރަންޓްގެ މައްސަލަ ކޮންޓްރޯލް ކުރުމުގެ ގޮތުން ޕާކިސްތާނުގެ ސަރުކާރުން ވަނީ ހޮނިހިރު ދުވަސް ބަންދު ކަމަށް ކަނޑައަޅާފައެވެ. ބާޒާރުގައި ފިހާރަތައްވެސް ރޭގަނޑު 8:30 ގެ ނިޔަލަށް ބަންދުކުރުމަށާއި ކައިވެނި ހަފްލާތައް ރޭގަނޑު 10:00 އާ ހަމައަށް ނިންމުމަށް ސަރުކާރުން ދަނީ އަންގަމުންނެވެ. އަދި މަގުބައްތި ނިއްވައިގެން ކަރަންޓް ބިލު ކުޑަ ކުރުމަށްވެސް ވަނީ ހުށަހަޅާފައެވެ.
ސަރުކާރުން އަންގާފައި ވަނީ އޮފިޝަލުން ބޭނުންކުރުމަށް އާ ވެހިކަލްތައް ގަތުމާއި އެއާ ކޮންޑިޝަނާ ފަދަ އާލާތްތައް ގަތުން ހުއްޓާލުމަށެވެ. އަދި ސަރުކާރުގެ އޮފީސްތަކަށް ކަނޑައަޅާފައިވާ ތެލުގެ މިންވަރުން 40 ޕަސެންޓް ކަނޑާލައި، ގައުމުން ބޭރަށް ކުރާ ދަތުރުތައް ހުއްޓާލުމަށްވެސް ފިޔަވަޅު އަޅާފައި ވެއެވެ.
ޕާކިސްތާނުން ދަނީ އައިއެމްއެފްއާއެކު ބެއިލް އައުޓު ޕެކޭޖަކަށް ނެގޯޝިއޭޓ ކުރަމުންނެވެ. އައިއެމްއެފުން ޑިމާންޑް ކޮށްފައި ވަނީ ޕާކިސްތާނުން ޗައިނާ ކަރަންޓް ކުންފުނިތަކަށް ދެމުންދާ ކޮންސެޝަންތައް ހުއްޓާލައި ޕާކިސްތާނުގެ ކަރަންޓު އުފައްދާ ކުންފުނިތަކާ އެއް ޕްރޮޓޮކޯލެއް އެތަންތާނގައިވެސް ފޮލޯ ކުރުމަށެވެ. އޭގެ އިތުރުން ސަބްސިޑީތައް ކަނޑާލުމަކީވެސް ޕާކިސްތާނަށް އައިއެމްއެފުން ލާޒިމް ކުރާ ކަމެކެވެ.
