ޕާކިސްތާނު ދަރިކޮޅުގެ އެމެރިކާ މީހުން ހިމެނޭ ވަފުދެއް މިދިޔަ މަހު އިޒްރޭލަށް ކުރި ދަތުރުގައި އިޒްރޭލާއި ޕާކިސްތާންގެ ގުޅުން ރަސްމީ ސިފައެއްގައި އެކުލަވާލުމުގެ ބަހުސް ފެށުނީކަމަށް ބުނެވެންފަށައިފިއެވެ. އިޒްރޭލަށ ްވަޑައިގަތް ވަފްދުގައި ޕާކިސްތާންގެ ސަރުކާރު ޓީވީގެ ކުރީގެ ނޫސްވެރިއެއް ކަމަށްވާ އަހުމަދު ޤުރައިޝީވެސް ހިމެނިވަޑައިގަތެވެ، މި ވަފްދުގައި ހިމެނިވަޑައިގަތް އެހެން ބޭފުޅުންގެ ތެރޭގައި ޕާކިސްތާންގައި ދިރިއުޅޭ އެންމެ ފަހުގެ ޔަހޫދީ މީހާ ފިޝެލް ބެންޚަލްދު ވެސް ހިމެނެއެވެ.
މިހާތަނަށް އިސްލާމްއާބާދުން އިޒްރޭލާއެކު ގުޅުން ގާއިމްކޮށްފައެއް ނުވެއެވެ. ނަމަވެސް އިސްލާމީ އަރަބި ގައުމުތަކުން ގުޅުން ރަގަޅު ކުރަން ފެށުމުން އިސްލާމްއާބާދުން ފަސް ނުޖެހޭނެކަމަށް ބެލެވެއެވެ.
އިޒްރޭލްގެ ހާއާޓްސް ނޫހުގައި ޕާކިސްތާންގެ ކަންވަރު ޚާލްދޫން ޝާހިދު ލިޔުއްވި ރިޕޯޓެއްގައި ބުނެފައި ވަނީ މިހާރު މަސްރަހު ޮއތް ގޮތުން އިޒްރޭލާއެކު ގުޅުން ގާއިމް ކުރުމަށް ޕާކިސްތާނަށް މަޖުބޫރުވާނެ ކަމަށެވެ.
އަރަބި ގައުމުތަކުން މިފަހަކަށް އައިސް ގުޅުން ރަގަޅު ކުރަން ފެށީ 2020ގައި ސޮއިކުރި އިބްރާހީމީ މުއާހަދާގެ އަލީގައެވެ.
މިހާތަނަށް ޕާކިސްތާނަކީ އިޒްރޭލާ އެކު ސިޔާސީ ގުޅުން ނުބާއްވާ އަދި އެ އެއްގައުމުގެ ރައްޔިތުން އަނެއް ގައުމަށް ޒިޔާރަތް ކުރުމަށްވެސް ހުއްދަ ނުދޭ ގައުމެކެވެ. އަދި އިޒްރޭލު ކުޅުންތެރިންނާއެކު ޕާކިސްތާނު ކުޅުންތެރިން ކުޅުމަށްވެސް އިސްލާމްއާބާދުން ހުއްދައެއް ނުކުރެއެވެ.
ޕާކިސްތާނުގެ ވެރިކަން ކުރެއްވި ބޭފުޅުންގެ ތެރޭން އަސްކަރީ ޑިކްޓޭޓަރުން ކަމަށްވާ ޖެނެރަލް ޒިއާއުލް ހައްގު (1977-88) އާއި ޖެނެރަލް ޕަރްވޭޒް މުޝައްރަފް (1999-2007) ވެސް އިޒްރޭލާމެދު ހަރުކަށި ގޮތްތަކެއް ނުގެން ގުޅުއްވައެވެ.
އަފްޣާނިސްތާންގައި ރޫސީންނާ ދެކޮޅަށް މުޖާހިދުން ހަނގުރާމަ ކުރަމުން ދިޔައިރު، ޕީޝާވަރުގައި މުޖާހިދުންނަށް އިޒްރޭލުގެ އަސްކަރީ ތަޖުރިބާކާރުން ދިޔައީ މަޝްވަރާތައް ދެމުންނެވެ.
