އިސްލާމޯފޯބިއާގެ މައްސަލަތަކުގައި އިނގިރޭސި ސަރުކާރުން ގެންގުޅޭ އެޑްވައިޒަރު ގާރީ އާސިމް އޭނާގެ މަގާމުން މިއަދު ވަކިކޮށްފިއެވެ. ގާރީ އާސިމް އަލީ ލީޑްސްގެ މައްކާ މިސްކިތުގެ އިމާމްވެސް މެއެއެވެ. އޭނާއަކީ އިނގިރޭސި މުޖުތަމައުގައި މުސްލިމުންގެ ޙިއްސާ އިތުރު ކުރުމުގެ މަސައްކަތުގައި އުޅޭ ފަރާތެއްވެސް މެއެވެ.
އޭނާ އިނގިރޭސި މުޖުތަމައަށް ކޮށްދީފައިވާ ޚިދުމަތުގެ އަގު ވަޒަންކޮށް އޭނާއަށް އިނގިރޭސި ސަރުކާރުން އިނާމު ދީފައިވެސް ވެއެވެ.
އާސިމްއާއި އިނގިރޭސި ސަރުކާރާ ދެމެދު ޖެހިގެން އުޅޭ މައްސަލައަކީ ފާތިމަތުގެފާނަށް ނިސްބަތްކޮށް އުފައްދާފައިވާ ފިލްމު ލޭޑީ ފްރޮމް ހެވަން އިނގިރޭސި ސިނަމާތަކުގައި ނުދައްކަން ބާރު އަޅައި އިހުތިޖާޖު ކުރުމުގައި އޭނާވެސް ބައިވެރިވެ އެކަމަށް ބާރުއަޅާފައި ވވުމެވެ. އިނގިރޭސި ސަރުކާރުން ބުނެފައި ވަނީ އޭނާގެ މި އަމަލަކީ، ޚިޔާލު ފާޅުކުރުމާއި ފަންނީ މަސައްކަތް ދެއްކުމަށް ހުރަސް އެޅުމުގެ އަމަލެއް ކަމަށާއި އެކަމުގެ ސަބަބުން އޭނާއަށް އޭނާގެ މަގާމުގެ މަސްއޫލިއްޔަތު ފުރިހަމަކަމަށް އަދާ ނުކުރެވޭނެ ކަމަށެވެ. އެހެންވެ، އިނގިރޭސި ސަރުކާރަށް އޭނާގެ ޚިދުމަތް އިތުރަށް ބޭނުން ނުވާ ކަމަށެވެ.
