އިންޑިއާގެ މަޝްހޫރު އިސްލާމީ ޖަމާއަތްތަކާއި މިސްކިތްތަކުގެ އިމާމުން ވަނީ ކީރިތި ރަސޫލާއަށް އިހާނެތި ބަސްތައް ރައްދުކޮށް ވާހަކަ ދެއްކެވުމާ ދެކޮޅަށް ކުރާ މުޒާހަރާތައް މަޑުޖައްސާލުމަށް މުސްލިމުންނަށް ގޮވާލާފައެވެ. އިންޑިއާ މުސްލިމުން މުޒާހަރާ ކޮށްފައި ވަނީ ރަސޫލާ މުޙައްމަދު صلى الله عليه وسلم ގެ އަބުރުފުޅަށް އިހާނެތި ބަސްތައް އިންޑިއާގެ ވެރިކަން ކުރާ ޕާޓީގެ ދެ މަސްއޫލުވެރިއަކު ރައްދު ކުރުމާ ގުޅިގެންނެވެ. ބީޖޭޕީން ވަނީ މި ދެ މީހުންގެ އެކަކު ޕާޓީން ވަކިކޮށްފައެވެ. އަދި އަނެއް މީހާގެ މައްސަލަތައް ބަލަމުންދާތީ އޭނާ ސަސްޕެންޑް ކޮށްފައެވެ.
އިންޑިއާގެ އެންމެ ބޮޑު މުސްލިމު ޖަމާއަތް ކަމުގައިވާ ޖަމާއަތޭ އިސްލީ ހިންދުން ގޮވާލާފައި ވަނީ މުޒާހަރާތައް މަޑު ޖައްސާ ލުމަށެވެ. މިދިޔަ ހަފްތާގައި މުޒާހަރާތައް ހޫނުވެ، މުސްލިމް ދެ ޒުވާނަކު މަރުވެ، 30 އަށް ވުރެ ގިނަ މީހުން ޒަހަމްވެފައި ވެއެވެ.
ޖަމާއަތޭ އިސްލާމީ ހިންދުގެ ފަރފާތުން ވާހަކަ ދެއްކެވި މާލިކް އަސްލަމް ވިދާޅުވީ އއިސްލާމް ދީނަށް ކުޑައިމީސް ބަސް ރައްދު ކުރުމަކީ އެކަމާ ދެކޮޅަށް އެންމެން އެކުގައި ތެދުވަން ޖެހޭ ކަމެއް ކަމަށާއި ނަމަވެސް އަމާން ކަމާއި ސުލްހަ މަސަލަސްކަން ދެމެހެއްޓުމަކީ ވަރަށް މުހިންމު ކަމެއް ކަމުގައެވެ.
ކީރިތި ރަސޫލާއަށް އިހާނެތި ބަސްތައް ރައްދު ކުދި ދެމީހުންނާ ދެކޮޅަށް ދީނީ ނަފްރަތު އުފެއްދުމުގެ ތުހުމަތުގައި މައްސަލަ ހުށަހަޅާފައި ވުމުން ފުލުހުން އެމައްސަލަތައް ބަލަމުން ގެންދެއެވެ.
އިންޑިއާގެ ފުލުހުން ބުނާ ގޮތުގައި އެތައް ސްޓޭޓްތަކެއްގައި ހަމަނުޖެހުން ހިންގި ކަމަށް ތުހުމަތު ކުރެވޭ 400 އެއްހާ މީހުން ހައްޔަރުކޮށް، ކާފިއު އިއުލާންކޮށް، ބައެއް ތަންތަނުގައި އިންޓަނެޓްގެ ހިދުމަތް މެދުކަނޑާލާފައިވެއެވެ.
