ޓައިވާނަށް ޗައިނާއިން އަސްކަރީ ހަމަލާއެއް ދީފިނަމަ، ރަޝިއާއިން ޔޫކްރެއިން އަށް ދިން ޙަމަލައާ ގުޅިގެން ދުނިޔޭގެ އިގްތިސާދަށް ލިބުނު ގެއްލުމަށް ވުރެން މާބޮޑެތި ގެއްލުންތަކެއް ދުނިޔޭގެ އިގްތިސާދަށް ވާނެ ކަމެއްކަމަށް ބުނެފައެވެ. މި ވާހަކަ ރޮއިޓާސްއާ ޙިއްސާ ކުރެއްވީ ޓައިވާންގެ އެންމެ އިސް ޓްރޭޑް ނެގޯޝިއޭޓަރު އެވެ.
ޖޯން ޑެންގް ވިދާޅުވީ މުޅި ދުނިޔެ ވެސް ޓައިވާނަށް ބަރޯސާވަނީ އިލެކްޓްރިކް ވެހިކަލްތަކާއި މޯބައިލް ފޯނުތަކުގައި ބޭނުންކުރާ ކޮމްޕިއުޓަރ ޗިޕްތަކުގެ ބޭނުމުގައެވެ. އޭގެ މާނައަކީ ޗައިނާގެ ހަމަލާއެއްގެ ސަބަބުން ޓެކްނޮލޮޖީއަށް ބަރޯސާވާ ކޮންމެ އިންޑަސްޓްރީއަކަށް ވެސް އޭގެ ނޭދެވޭ އަސަރު ކުރާނެ ކަމަށެވެ.
ރަޝިޔާއިން ޔޫކްރެއިންއަށް ހަމަލަ ދިނުމާ ގުޅިގެން ޗައިނާއިން ވަނީ ޓައިވާނާ ދެކޮޅަށް ދޭނެ އަސްކަރީ ހަމަލައާ ގުޅޭ ޑްރިލްތައް ބާއްވައި ބަސްމަގު ބަދަލުކޮށް ހަރުކަށި ވާހަކަތައް ދައްކަން ފަށާފައެވެ. އަދި ޓައިވާނަށް އަތްގަދަކުރުމުގެ ހިތްވަރު ޗައިނާއަށް ލިބިދާނެ ކަމުގެ ބިރު މުޅި ދުނިޔެއިން ވަނީ އިހުސާސް ކޮށްފައެވެ.
ރަޝިޔާއިން ފެށި ހަނގރާމައިގެ ސަބަބުން ދުނިޔޭގެ އެކި ކަންކޮޅުތަކަށް އިޤްތިޞާދީ ހީނަރުކަން ވެރިވެފައި ވެއެވެ. ތެލާއި ގޭހުގެ އަގު ވަނީ ވަރަށް ބޮޑަށް އުފުލިފައެވެ. ޔުކްރެއިން އިން ގޮދަނުގެ ބާވަތްތައް އެކްސްޕޯޓްކުރުން މަނާކުރުމުގެ ސަބަބުން ދުނިޔޭގެ މާޒާރުގައި ކާނާގެ އަގު ބޮޑުވެފައި ވެއެވެ. އޭގެ އިތުރުން ބައިނަލްއަގްވާމީ ސަޕްލައި ޗެއިންތަކަށް ބުރޫއަރާފައި ވެއެވެ.
ރޮއިޓާސް އިން ރިޕޯޓުކޮށްފައިވާ ގޮތުގައި މިދިޔަ އަހަރު ޓައިވާނުން އެކްސްޕޯޓް ކޮށްފައިވާ ޗިޕްގެ އަގު 118 ބިލިއަން ޑޮލަރަށް އަރަ އެވެ.
ޑެންގް ވިދާޅުވީ ޓައިވާންގެ ޗިޕް އެކްސްޕޯޓްގެ 40 އިންސައްތަ ސަޕްލައި ކުރެވެނީ ޗައިނާއަށެވެ. ނަމަވެސް ޓައިވާންގެ އޮފިޝަލުން މަސައްކަތް ކުރަމުން ދަނީ ސަޕްލައި އިތުރު އެހެން ގައުމުތަކަށް ފޮނުވުމަށެވެ.
މިދިޔަ މަހު ރައީސް ބައިޑަން ވިދާޅުވީ ޗައިނާއިން ޓައިވާނަށް އަރައިގެންފިނަމަ ޓައިވާން ދިފާއުކުރަން އެމެރިކާ ތައްޔާރަށް އޮންނާނެ ކަމަށެވެ. ބައިޑެންގެ މި ވާހަކައިން ޗައިނާ ޓައިވާން މަސްރަހު ވަނީ އިތުރަށް ހޫނުވެގެން ގޮސްފައެވެ.
ވައިޓް ހައުސް އިން ފަހުން ސާފުކޮށްދިން ގޮތުގައި އެމެރިކާއިން އަދިވެސް އަމަލުކުރަމުން ދާނީ "ވަން ޗައިނާ" ޕޮލިސީއާ އެއްގޮތަށް ކަމަށާއި އެމެރިކާގެ އެ ސިޔާސަތަށް އަދި ބަދަލެއް ނާންނަ ކަމަށެވެ.
