އަފްޣާނިސްތާނުގައި ހުންނަ އިނގިރޭސި އެމްބަސީގައި ކުރިން މަސައްކަތް ކުރި ބައެއް މުވައްޒަފުން ބުނީ ތާލިބާނުން އެމީހުންނަށް އަނިޔާކޮށްފައިވާ ކަމަށެވެ. ޔޫކޭ އެމްބަސީގައި މިހާރުވެސް 100 އެއްހާ މީހުން ފޯރިއަށް ތިބެއެވެ.
މި މީހުން މަސައްކަތް ކުރީ ޔޫކޭ އެމްބަސީ ގާޑު ކުރުމުގެ މަސައްކަތުގައި އުޅުނު ބައިނަލްއަގްވާމީ ބޮޑު ސެކިއުރިޓީ ކުންފުންޏެއްގައެވެ. އަދި މިއިން ބައެއް މީހުންނަކީ 10 އަހަރަށް ވުރެ ގިނަ ދުވަސް ވަންދެން މަސައްކަތް ކޮށްފައި ތިބި މީހުންނެވެ.
ބައެއް މީހުން ވަނީ ތާލިބާނުން ކޮށްފައިވާ އަނިޔާ ކަމަށް ބުނެ އެމީހުންނަށް ލިބިފައިވާ އަނިޔާގެ ފޮޓޯތައް ސޯޝަލް މީޑިއާގައި ޕޯސްޓްކޮށްފަ އެވެ.
އިނގިރޭސި ސަރުކާރުން ބުނީ މިދިޔަ އަހަރުން ފެށިގެން އަފްޣާނިސްތާނުން 15،000 އަށް ވުރެ ގިނަ މީހުން ބޭރަށް ގެންގޮސްފައިވާ ކަމަށެވެ. އަދި އިތުރު މީހުން ގެންދިއުމަށް މަސައްކަތް ކުރާ ކަމަށެވެ.
އަފްޣާނިސްތާނުގައި ދިރިއުޅެމުންދާ 150 އަށް ވުރެ ގިނަ މީހުންގެ ނަން ހިމެނޭ ލިސްޓެއް ބީބީސީއަށް ލިބިފައިވެއެވެ. އޭގެ ތެރެއިން އެކަކު ބުނީ އޭނާ އަކީ މީގެ ކުރިން އިނގިރޭސި އެމްބަސީގެ ސެކިއުރިޓީ ގާޑެއްގެ ގޮތުގައި މަސައްކަތް ކުރި މީހަކަށް ވާތީ، ތާލިބާނުން ގެ ބަޔަކު އައިސް އޭނާގެ ގައިގައި ތަޅައި އަނިޔާކުރި ކަމަށެވެ. ސަލާމަތީ ސަބަބުތަކަށްޓަކައި ނަން ހާމަކުރެވެން ނެތް ކަމަށް އެމީހާ ބުންޏެވެ.
