އެފްރިކާއިން މީހުން ވަގަށް ނަގައިގެން އެމީހުން އަޅުންނަށް ހަދައި ވިއްކުމުގެ ވިޔަފާރީގައި އުޅެފައިވާތީ އެކަމަށް އިނގިރޭސިވިލާތުގެ ނަސާރާ ފައްޅި، ޗަރޗް އޮފް އިންގްލެންޑުން މައާފަށް އެދެފިއެވެ. އިސްފާދިރީ އާރޗް ބީޝޮޕް އޮފް ކެންޓަބަރީ އެކުލަވާލެއްވި ކޮމިޝަނަށް ސާބިތުވެފައި ވަނީ އަޅުންގެ ވިޔަފާރި ކުރުމުގައި ފަންޑެއް ހުޅުވައިގެން ފައްޅިން ވިޔަފާރި ނަގާފައިވާ ކަމަށެވެ. މި ފަންޑުގައި ފައްޅިން 100 އަހަރު ވަންދެން ވިޔަފާރި ކުރިކަން ސާބިތުވިއެވެ.
މިހާރު މި ފަންޑަކީ 10 ބިލިއަން ޑޮލަރުގެ އަގުހުރި އިންވެސްޓްމެންޓް ފަންޑެކެވެ.
ފައްޅިން މި ފަންޑު އުފައްދާފައި ވަނީ 1739ގައި ފަގީރު ފާދިރީންނަށް އެހީ ވުމަށެވެ. އެއިރު، މިހާރު ފައިސާއިން ބަލާއިރު 400 މިލިއަން ޕައުންޑް ސައުތު ސީ ކުންފުނީގައި އިންވެސްޓް ކުރިއެވެ. ސައުތު ސީ ކުންފުންޏަކީ މީހުން އެފްރިކާއިން ވަގަށް ނަގައިގެން ގެންގޮސް ވިއްކި ކުންފުންޏެވެ.
މި މައްސަލަ ކުށްވެރި ކުރައްވަމުން އިސްފާދިރީ ވިދާޅުވީ "މި ނަހަލާލު ވިޔަފާރީގައި الله ގެ އަންހެން ފިރިހެން މަޚުލޫގުންނާ ކުޑަކުދިން އެބައިމީހުންގެ ޢިއްޒަތާއި މިނިވަންކަން ނިގުޅައިގަނެ" ވިއްކާލާ ފައި ވެއެވެ. އަދި ފައްޅީގެ ތެރޭގައި ތިބި ބައެއް މީހުން މިކަމުން އާމްދަނީއާއި މަންފާ ހޯދުމަކީ ފައްޅީގައި ޖެހިފައިވާ ލައްގަނޑެކެވެ.
