އިނގިރޭސިވިލާތަށް ހިޖުރަކުރާ މީހުން ރުވާންޑާއަށް ގެންދިޔުމަށް ހަމަޖެހިފައި އޮތް ފުރަތަމަ ފްލައިޓް ޔޫރަޕިއަން ކޯޓް އޮފް ހިއުމަން ރައިޓްސް އިން ހުއްޓުވާ ލައިފިއެވެ.
އިނގިރޭސިވިލާތުގައި ޔޫރަޕިއަން ކޯޓް އޮފް ހިއުމަން ރައިޓްސް އާ މެދު ނުރުހުމުގެ އަޑުތައް ގަދަވާން ފަށައިފިއެވެ. ބޮޑު ވަޒީރު ބޮރިސް ޖޯންސަން ވަނީ އޭނާގެ ސަރުކާރަށް ތާއީދު ކުރާ ފަރާތްތަކުން ބޭނުންވާނަމަ އެކޯޓުގެ މެމްބަރުކަމުން އިނގިރޭސިން ވަކިވުމަށް ފުރުސަތު އޮތް ކަމުގެ އިޝާރާތެއް ދެއްވާފައެވެ. އިނގިރޭސިން ބޭނުން ވަނީ އެގައުމަށް ހިޖުރަކޮށްފައިވާ މީހުން ރުވަންޑާއަށް ބޭރުކޮށްލާށެވެ. މިކަމުގައި ބޮރިސދްގެ ވާގިވެރިއަކީ އިނގިރފޭސި ދާޚިލީ ވަޒީރު ޕްރިޓީ ޕަޓީލްއެވެ. ޚުދު އޭނާއަކީ އިންޑިއާގެ ހިޖުރަވެރި ދެމަފިރިއެއްގެ ދަރިއެވެ.
ވެރިކަންކުރާ ކޮންޒަވޭޓިވް ޕާޓީއަށް ނިސްބަތްވާ ޕާލަމެންޓް މެމްބަރުން ވަނީ، އެހެން ގައުމެއްގައި ހުންނަ ކޯޓަކަށް، ޚާއްސަކޮށް ޔޫރަޕްގެ އިއްތިހާދުން އިނގިރޭސިވިލާތް ވަކިވުމަށް ފަހު، އިނގިރޭސިވިލާތުން ފުރައިގެން ދާން އޮތް ފްލައިޓެއްގެ ދަތުރަށް ހުރަސް އެޅުމުގެ ހައްގު ލިބިގެން ނުވާނެ ކަމަށް ބުނެ ވަރަށް ބޮޑަށް ރުޅިވެރިކަން ފާޅުކުރައްވާފައެވެ.
ޔޫރަޕިއަން ކޯޓް އޮފް ހިއުމަން ރައިޓްސް އަކީ 1959 ވަނަ އަހަރު ފަރަންސޭސި ވިލާތުގެ ސިޓީއެއް ކަމަށްވާ ސްޓްރަސްބޯގްގައި އުފައްދާފައިވާ ކޯޓެކެވެ. މި ކޯޓަކީ ޔޫރަޕިއަން ޔޫނިއަންއާ ގުޅުން އޮންނަ ކޯޓތެއް ނޫނެވެ. މި ކޯޓަކީ ޔޫރަޕިއަން ޕާލަމެންޓްގެ މެމްބަރު ޤައުމުތަކުގެ ތެރެއިން އިންސާނީ ޙައްޤުތަކާއި އަސާސީ މިނިވަންކަން ބަޔާން ކުރާ (ޔޫރަޕިއަން ޗާޓަރ އޮފް ހިއުމަން ރައިޓްސްގެ ނަމުންވެސް މަޝްހޫރުވެފައިވާ) ޤަރާރު ތަޞްދީޤުކޮށްފައިވާ ޤައުމުތަކުގެ ޢަދަދާ އެއްވަރަށް ފަނޑިޔާރުންތަކެއް ހިމެނޭ ކޯޓެކެވެ. މިކޯޓުގެ ފަނޑިޔާރުންނަކީ މިނިވަން ބައެކެވެ. އެބޭފުޅުން ތަމްސީލު ކުރައްވަނީ ސަރުކާރު ތަކެއް ނޫނެވެ.
ޔޫރަޕިއަން ޕާލަމެންޓަކީ ޔޫރަޕްގައި އިންސާނީ ހައްގުތަކަށް މަސައްކަތް ކުރާ އެންމެ ބޮޑު ޖަމާއަތެވެ. މި ޕާލަމެންޓްގައި 46 މެމްބަރު ގައުމު ހިމެނޭއިރު، އޭގެ ތެރޭގައި އީޔޫގެ 27 މެމްބަރު ގައުމު ހިމެނެ އެވެ. މި މަޖިލީހަކީ 1949 ވަނަ އަހަރު ޔޫރަޕްގެ މައްސަލަތައް ހައްލުކުރުމަށާއި މިނިވަންކަމާއި އިންސާނީ ހައްގުތަކަށް ފޯކަސް ކުރުމުގެ މަގްސަދުގައި އުފެއްދި ކައުންސިލެކެވެ.
ދެވަނަ ބޮޑު ހަނގުރާމަ ނިމުމުގެ ކުރިން، އިނގިރޭސި ކުރީގެ ބޮޑުވަޒީރު ވިންސްޓަން ޗާޗިލް 1943 ވަނަ އަހަރު ޔޫރަޕިއަން ކައުންސިލެއް އުފެއްދުމަށް ހުށަހެޅުއްވިއެވެ. އެއީ ޔޫރަޕްގައި ނާޒީން ހިންގި ޖަރީމާތައް ތަކުރާރުވިޔަ ނުދިނުމަށާއި، އެ ޖަރީމާތައް ހުއްޓުވުމަށް ޓަކައެވެ.
ޔޫރަޕިއަން ކޯޓް އޮފް ހިއުމަން ރައިޓްސް މަސައްކަތް ކުރަނީ ޔޫރަޕިއަން ޗާޓަރ އޮފް ހިއުމަން ރައިޓްސް ތަންފީޒު ކުރުމަށެވެ.
މި ކޯޓަށް މައްސަލަ ހުށަހެޅާ ފަރާތަކީ ކޮންމެހެން މެމްބަރު ގައުމެއްގެ ރައްޔިތަކަށް ވާކަށް ނުޖެހެއެވެ. ނަމަވެސް އެ ޝަކުވާ ރައްދުވާ ފަރާތަކީ މެމްބަރު ގައުމުތަކުގެ ތެރެއިން ގައުމަކަށް ވާން ޖެހެއެވެ. އަދި އެޝަކުވާގައި ހިމެނޭ ފަރާތަކީ މެމްބަރު ގައުމެއްގެ ފަސްގަނޑުގައި ހައްގަށް އުނިކަމެއް ދިމާވި މީހެއްކަމުގައި ވާން ޖެހެއެވެ.
އެކޯޓަށް މައްސަލަ ހުށަހެޅާ ފަރާތަކީ ވަކި ފަރުދަކަށް ނުވަތަ އިދާރާއަކަށް ނުވަތަ މުއައްސަސާއަކަށްވެސް ވެދާނެއެވެ.
ޔޫރަޕިއަން ކޯޓް އޮފް ހިއުމަން ރައިޓްސްއަށް މެމްބަރު ގައުމުތަކުގެ ކޯޓުތަކުން ޝަރުއީ ގޮތުން ނިންމާ ނިންމުންތައް ބާތިލު ކުރުމުގެ ނުވަތަ އެ ނިންމުންތަކަށް އަމަލު ކުރެވޭ ގާނޫނުތައް އުވާލުމުގެ ބާރެއް ލިބިގެން ނުވެއެވެ.
