ފައިސާގެ ދަތިކަން ކުރިމަތިވެފައިވާ ސްރީލަންކާއަށް އިތުރު ހަތަރު މަހަށް ބޭނުންވާ ތެޔޮ ގަތުމަށް އިންޑިއާއިންއައު ކްރެޑިޓް ލައިނެއް ހަމަޖައްސައި ދީފިކަމަށް ސްރީލަންކާގެ ބޮޑުވަޒީރު ރަނިލް ވިކްރަމަސިންހަ އިއުލާން ކުރައްވައިފިއެވެ. އޭނާ ވިދާޅުވީ މި ކްރެޑިޓް ލައިނަކީ ޖުލައި މަހުން ފެށިގެން އިތުރު ހަތަރު މަސް ދުވަހަށް ބޭނުންވާ ތެޔޮ ސަޕްލައި ކުރުމަށް ދޫކުރާ އެލްއޯސީއެއް ކަމަށެވެ.
ސްރީލަންކާއަށް މިހާރުވެސް ވަނީ 3500 މެތްރިކް ޓަނުގެ އެލްޕީޖީ ޝިޕްމަންޓެއް ވަދެފައެވެ. މި ޝިޕްމަންޓުން ގޭސް ޑެލިވަރީ ކުރާނީ ހޮސްޕިޓަލް، ހޮޓާ ފަދަ ގިނަ އަދަދަކަށް ސްޓޮކް ބޭނުންވާ ތަންތަނަށް ކަމަށް ނިއުސް ފަސްޓް ވެބްސައިޓްގައި ބޮޑު ވަޒީރާ ހަވާލާދީ ބުނެފައި ވެއެވެ.
ވިކްރަމަސިންހަ ވިދާޅުވީ ތެލުގެ ސަޕްލައި މެދުނުކެނޑި ލިބޭނެކަމުގެ ޔަގީންކަން އޮތް ކަމަށާއި މިހާރު އޮތް ޑިމާންޑުގެ 50 ޕަސަންޓް ފުރިހަމަ ކުރެވޭނެ ކަމުގެ ޔަގީންކަން އޮތް ކަމަށެވެ.
