ސޮލޮމޮން އައިލެންޑްސްގައި ޗައިނާގެ އެއްވެސް އަސްކަރީ މަރުކަޒެއް ނުހުންނާނެ ކަމަށް އެގައުމުގެ ބޮޑުވަޒީރު މަނަސެހް ސޮގަވަރޭ ވިދާޅުވެއެވެ.
ޕެސިފިކް ސަރަޙައްދުގައި ބެއިޖިންގގެ ނުފޫޒު އިތުރުވަމުންދާތީ އެކަމުގެ ކަންބޮޑުވުން ތަކަށް ހައްލެއް ހޯދުމުޖގެ ގޮތުން ސޮލޮމަން އައިލެންޑްސްއަށް ވަޑައިގަތް އޮސްޓްރޭލިއާގެ އާ ޚާރިޖީ ވަޒީރު ޕެނީ ވޮންގްގެ މަޝްވަރާގައި ސޮގަވަރޭ ވިދާޅުވީ އޮސްޓްރޭލިއާއަކީ، ސޮލޮމަންގެ ސަލާމަތާއި ތަރައްޤީގެ ކަންކަމުގައި އިޚްތިޔާރުކުރާ އެންމެ ފުރަތަމަ ބައިވެރިޔާކަމަށެވެ.
ވޮންގ ސޮލޮމަންއަށް ވަޑައިގަތުމުން ބޮޑު ވަޒީރު ވަނީ އޭނާއަށް އިހުތިރާމް އަދާ ކުރައްވާފައެވެ.
އޮސްޓްރޭލިއާ އިން ވަނީ ސޮލޮމަން އައިލެންޑްސްގައި އުފެދުނު ހަމަނުޖެހުން ކޮންޓްރޯލު ކުރުމަށް އެގައުމުގެ ފުލުހުން ފޮނުވާފައެވެ. ވޮންގގެ ދަތުރުފުޅުގައި އޭނާ ވަނީ ސޮލޮމަން އައިލެންޑްސްގައި ހިނގި ހަމަނުޖެހުމުގެ ޝިކާރައަކަށްވި ކޮމިއުނިޓީއަކަށް ޒިޔާރަތްކޮށް، ވަޒީފާއިން މަހުރޫމްވެފައިވާ އެ ސަރަހައްދުގެ ޒުވާނުންނަށް އާ ވިސާ ޕްރޮގްރާމެއްގެ ދަށުން އޮސްޓްރޭލިއާގައި ވަޒީފާ އަދާކުރުމަށް ފުރުސަތު ދޭން ނިންމަވާފައެވެ.
އެމެރިކާއާއި އޮސްޓްރޭލިއާއިން ޗައިނާއާ ވާދަކުރާ މިސަރަހައްދަށް އޮސްޓްރޭލިއާގެ ޚާރިޖީ ވަޒީރު ވަޑައިގަތީ ޗައިނާގެ ޚާރިޖީ ވަޒީރު ވާންގް ޔީ، ސަރަހައްދަށް ވަޑައިގަތްތާ މާގިނަ ދުވަހެއް ނުވަނީހެވެ.
ފެސިފިކް ސަރަހައްދަށް ވާންގ ޔީ ކުރެއްވި ދަތުރުފުޅުގައި ނާކާމިޔާބީއާ ކުރިމަތިވެ ވަޑައިގެންފައި ވެއެވެ.
އޭނާ ގެ ދަތުރުފުޅުގައި ޕެސިފިކް ޖަޒީރާ 10 ގައުމަކާއެކު ވިޔަފާރިއާއި ސަލާމަތީ އެއްބަސްވުމެއްގައި ސޮއިކުރުމަށް ޗައިނާއިން ރާވާފައިވާ ޕްލޭން އެގައުމުތަކުން ވަނީ މަޑުޖައްސާލާފައެވެ. އެގައުމުތަކުން ވަނީ އެ ޕްރޮޕޯސަލްގައި ހިމެނޭ ވަކި ވަކި ބައިތަކާމެދު ކަންބޮޑުވުން ފާޅުކޮށްފައެވެ.
