ދުނިޔޭގެ ރެފިއުޖީންގެ ދުވަހުގެ މުނާސަބާގައި ރެފިއުޖީންނާ ބެހޭ އދގެ އިދާރާއިން ބުނަނީ އެކިއެކި ހާދިސާތަކާ ހެދި 100 މިލިއަން މީހުންނަށް އެމީހުންގެ ވަޒަން ދޫކޮށް ރެފިއުޖީންނަށް ވާން މަޖުބޫރު ވެފައިވާ ކަމަށެވެ. މިއިން ދިހައެއް އިންސައްތަ ރެފިއުޖީންނަކީ ޔުކްރެއިންގެ ހަނގުރާމަިއގެ ސަބަބުން ރެފިއުޖީންނަށް ވެފައިވާ މީހުންނެވެ.
ރެފިއުޖީންގެ ދުވަހަކީ މި މަހުގެ 20 ވަނަ ދުވަހެވެ. ދުވަހުގެ މުނާސަބާއާ ގުޅުވައިގެން ބީބީސީން ތައްޔާރުކޮށްފައިވާ ރިޕޯޓެއް ޚާއްސަ ކޮށްފައި ވަނީ ސަލީމާ ރަޙުމާނަށެވެ.
އުމުރުން 29 އަހަރުގެ ޑރ. ސަލީމާ އަކީ އަފްޣާނިސްތާންގެ ތުރުކުމާން ދަރިކޮޅުގެ ތިން ވަނަ ޖީލުގެ ރެފިއުޖީއެކެވެ.
އޭނާއަކީ އޭނާގެ ދަރިކޮޅުން އެމްބީބީއެސް ހެދި ފުރަތަމަ މީހާއެވެ. އޭނާ ކިޔައިދިން ގޮތުގައި އޭނާގެ ކްލިނިކަށް އަންނަ ގިނަ ކުދިން ދަނީ ސަލީމާއެކޭ އެއްފަދައިން މެޑިސިން ކިޔަވައިގެން މޮޅުވާނެ ކަމަށް ބުނަމުންނެވެ.
ސަލީމާ އުޅެ ބޮޑުވީ ކަރަންޓާއި ފެނުގެ ޚިދުމަތް ނުލިބޭ ޕާކިސްތާންގައި ހުރި އަފްޣާން ރެފިއުޖީންގެ ކޭމްޕެއްގައެވެ.
އޭނާއަށް މެޑިސިން ކިޔަވަން ވަދެވުނީ ޔުނިވަރސިޓީގައި ރެފިއުޖީންނަށް ޚާއްސަކޮށްފައި އޮތް ހަމައެކަނި ސްލޮޓަށެވެ.
އޭނާގެ ޚިދުމަތަށް ރެފިއުޖީންނާ ބެހޭ އދގެ އިދާރާގެ 2021ވަނަ އަހަުރގެ އިނާމު އޭނާއަށް ލިބިފައި ވެއެވެ.
