އިސްލާމްއާބާދުން ކުރިން ގެންގުޅުނު ސިޔާސަތުތަކުގެ ސަބަބުން ދުނިޔޭގެ ފެންވަރުގައި ޕާކިސްތާން ވަނީ އެކަހެރިވެފައި ކަމަށް ޕާކިސްތާނުގެ ޚާރިޖީ ވަޒީރު ބިލާވަލް ބުއްޓޫ ޒަރްދާރީ ވިދާޅުވެއެވެ.
ޕާކިސްތާނުގެ ޑެއިލީ ޑޯން ނޫހުން ބުނީ ބިލާވަލް ބުއްޓޫ ޒަރްދާރީ ފާހަގަކުރެއްވި ގޮތުގައި ދެގައުމު ހަމަޖެހުމަކަށް ނައައިސްގެން އުޅެނީ އިންޑިއާގެ ހަނގުރާމައިގެ ދިގު ތާރީޚެއް އޮތުމުގެ ސަބަބުންނެވެ.
ޕާކސްތާންގެ އުލްމީ ފެންވަރުގެ ބޭފުޅުން ހިމެނިވަޑައިގަތް ބައްދަލުވުމެއްގައި ވާހަކަ ދައްކަވަމުން އޭނާ ވިދާޅުވީ ޕާކިސްތާނާއި އިންޑިއާއާ ދެމެދު މައްސަލަތައް އެބަހުރި ކަމަށާއި އަދި ދެ ގައުމަކީވެސް ހަނގުރާމައާއި ހަމަނުޖެހުންތަކުގެ ދިގު ތާރީޚެއް އޮތް ދެ ގައުމު ކަމަށެވެ.
އަދި އޭނާ ވިދާޅުވީ ދެފަރާތް ދެމެދު ސީރިއަސް ދެބަސްވުންތަކެއް އުފެދިފައިވާ އިރު 2019 ވަނަ އަހަރުގެ އޮގަސްޓް މަހުގެ ހާދިސާތައް ލުއިގޮތަކަށް ބަލައިގެން ނުވާނެ ކަމަށެވެ.
ބުއްޓޫ ޒަރްދާރީ ވިދާޅުވީ އިންޑިއާއިން އެ ގައުމުގެ ގާނޫނުއަސާސީގެ މާއްދާ 370 އުވާލައި ކަޝްމީރަށް ދީފައިވާ ހާއްސަ ދަރަޖަ މިދިޔަ އަހަރުގެ އޮގަސްޓް މަހުގެ 5 ވަނަ ދުވަހު އުވާލުމާ ގުޅިގެން އިންޑިއާއާއި ޕާކިސްތާނުގެ ގުޅުން ވަނީ ވަރަށް ބޮޑަށް ހީނަރުވެފައެވެ.
ކަޝްމީރުގެ މައްސަލައާ ބެހޭ ގޮތުން އޭނާ ވިދާޅުވީ ކޮންމެ ވާހަކައެއްގެވެސް އަސާސަކީ ކަޝްމިރު ކަމަށެވެ.
މި ބައްދަލުވުމުގައި ތިއްބެވި ބައިވެރިންނާ ބުއްޓޫ ސުއާލު ކުރެއްވީ ޕާކީސްތާންގެ މަސްލަހަތަށް އެންމެ ރަގަޅު ގޮތަކީ އިންޑިއާއާ ގުޅުން ކަނޑާލައިގެން ކުރިއަށް ދިއުންތޯއެވެ؟ އަދި އިންޑިއާއާއެކު އޭނާގެ މަންމަ ބޭނަޒީރުގެ ވެރިކަމުގައި ބާއްވާފައިވާ ގުޅުމާއި އެއިން ލިބުނު އގްތިސާދީ މަންފާގެ މައްޗަށްވެސް އޭނާ ވާހަކަ ދެއްކެވިއެވެ.
