ޓިކްޓޮކްއާ ބެހޭ ގޮތުން ލީކުވެފައިވާ އޯޑިއޯތަކުން އެނގޭ ގޮތުގައި ޓިކްޓޮކްގެ ޗައިނާގެ ބެލެނިވެރި ކުންފުނިން އެތައް މަހެއް ވަންދެން އެމެރިކާގެ ޔޫޒަރުންގެ ޑޭޓާތަކަށް ޖާސޫސްކޮށްފައިވާ ކަން އެނގޭކަން ބަޒްފީޑުން ރިޕޯޓް ކޮށްފިއެވެ.
ބަޒްފީޑް ނިއުސް އިން ހޯދާފައިވާ މި އޯޑިއޯގައި 2021 ވަނަ އަހަރުގެ ސެޕްޓެމްބަރު މަހުން ފެށިގެން 2022 ވަނަ އަހަރުގެ ޖެނުއަރީ މަހާ ދެމެދު ޓިކްޓޮކްގައި 80 އަށް ވުރެ ގިނަ އެތެރޭގެ މީޓިންގތަކުގެ އޯޑިއޯތައް ހިމަނާފައި ވެއެވެ.
ބަޒްފީޑުން ބުނީ މި އޯޑިއޯތަކުން އެނގޭ ގޮތުގައި އެމެރިކާގެ މުވައްޒަފުންނަށް ޓިކްޓޮކް ބޭނުންކުރާ މީހުންގެ ޑޭޓާއަށް އެކްސެސް ވުމުގެ ހުއްދަ ދީފައި ނުވިނަމަވެސް ޗައިނާގައި މައިކުންފުނީގައި މަސައްކަތް ކުރާ މުވައްޒަފުންނަށް އެކަމުގެ ހުއްދަ އޮންނަ ކަމަށެވެ.
ޓިކްޓޮކްގެ ބެލެނިވެރި ކުންފުނި ބައިޓްޑާންސްއަކީ ޗައިނާގެ ގާނޫނުގެ ދަށުން ޗައިނާގެ ކޮމިއުނިސްޓް ޕާޓީއަށް ބޭނުންވާ ޑޭޓާ، އެދިއްޖެ ކޮންމެ ހިނދެއްގައި ހިއްސާކުރަން ލާޒިމް ކޮށްފައިވާ ކުންފުންޏެއް ކަމަށް ބިޒްނަސް އިންސައިޑާއިން ބުނެއެވެ.
ބިޒްނަސް އިންސައިޑާއަށް މި މައްސަލައާ ގުޅޭ ގޮތުން ޓިކްޓޮކްއިން ބުނެފައި ވަނީ ޑޭޓާ ސެކިއުރިޓީގެ މަސައްކަތްތައް ވަރުގަދަ ކުރުމަށް އެހީތެރިވެދިނުމުގެ ގޮތުން ދުނިޔޭގެ ފެންވަރުގެ އިންޓާނަލް އަދި އެކްސްޓާނަލް ސެކިއުރިޓީ އެކްސްޕާޓުން އެކުންފުނިން ބޭނުން ކުރާ ކަމަށެވެ. އަދި ޓިކްޓޮކްއިން މަސައްކަތް ކުރަނީ އިންޑަސްޓްރީގެ ބެސްޓްޕްރެކްޓިސްއަށް ޑޭޓާ ސެކިއުރިޓީ ގެންދިއުމަށް ކަމަށް ބުންޏެވެ.
ޓިކްޓޮކްއިން އިތުރަށް ބުނެފައި ވަނީ އެކުންފުނިން މެއި މަހު އާ އިންހައުސް ޑިޕާޓްމެންޓެއް، އުފެއްދި ކަމަށާއި އެއީ އެމެރިކާގެ ޑޭޓާ ސެކިއުރިޓީ (ޔޫއެސްޑީއެސް) ކަމަށެވެ.
މިއީ އެމެރިކާގެ ލީޑާޝިޕާއެކު، އެމެރިކާގެ ޑޭޓާ ސެކިއުރިޓީއަށް މިހާރަށްވުރެ ވަރުގަދަކޮށް، ޑޭޓާ ރައްކާތެރިކުރުމުގެ ސިޔާސަތުތަކާއި ޕްރޮޓޮކޯލްތައް ހަރުދަނާކޮށް، ޓިކްޓޮކް ބޭނުންކުރާ ފަރާތްތަކަށް އިތުރަށް ރައްކާތެރިކަން ދީ، ސިސްޓަމްތަކާއި ކޮންޓްރޯލްތަކަށް އިތުބާރު އުފެއްދުމަށް ކުންފުނިން މިހާރު ކުރަމުންދާ މަސައްކަތުގެ ބައެއްކަމަށް ޓިކްޓޮކުން ބިޒްނަސް އިންސައިޑަރއަށް ފޮނުވި ސްޓޭޓްމެންޓެއްގައި ބުންޏެވެ.
