ބެއިޖިން އިން ދަނީ ޓައިވާން ކަނޑު އޮޅިއަށް ބައިނަލްއަގްވާމީ ގާނޫނު ނުހިނގާނެ ކަމަށް ބުނެ ޓައިވާންއާ މެދު ހަރުކަށިކަން ދައްކަމުންނެވެ. ޗައިނާއަކީ ކަނޑުތަކާ ބެހޭ އދގެ މުއާހަދާގައި ސޮއިކޮށްފައިވާ ގައުމެކެވެ. އެމެރިކާއިން މި މުއާހަދާގައި ސޮއިކޮށްފައެއް ނުވެއެވެ. އެހެންނަމަވެސް އެމެރިކާއިން ބުނަނީ ކަނޑުތަކާ ބެހޭ މުއާހަދާއަކީ ބައިނަލްއަގުވާމީ ގާނޫނު ނެގެހެއްޓުމަށް އެއީ މުހިންމު މުއާހަދާއެއް ކަމަށެވެ.
ޓައިވާންގެ ކަނޑު އޮޅިއަކީ 160 ކިލޯމީޓަރު ފުޅާ ކަނޑު އޮޅިއެކެވެ. މި ކަނޑު އޮޅި ވަނީ އެތައް ސަތޭކަ އަހަރެއް ވަންދެން ކަނޑިދަތުރުފަތުރުގެ ވިޔަފާރީގައި ގައުމުތަކުން މިނިވަންކަމާއެކު ހަރަކާތްތެރިވާ ކަނޑެއްގެ ގޮތުގައި ބޭނުން ކޮށްފައެވެ.
ޓައިވާން ކަނޑު އޮޅިއަކީ ޖަޕާނާއި ދެކުނު ކޮރެއާގެ ޓޭންކަރުތަކާއި މުދާ އުފުލާ ބޯޓުތަކަށް ވަރަށް މުހިއްމު މަގެކެވެ. އަދި އެމެރިކާއިން ގަސްދުގައި އެ ސަރަހައްދަށް ހަނގުރާމަމަތީ މަނަވަރުތައް ފޮނުވަނީ އެމެރިކާއިން ކުރިއަށް ގެންދާ "ކޮންމެ ގައުމަކަށްވެސް އެސަރަހައްދުގައި މިނިވަންކަމާއެކު ދަތުރުކުރުމުގެ ހައްފގު ލިބިފައިވާކަން ކަށަވަރުކޮށްދިނުމުގެ" ކެމްޕެއިންގެ ދަށުންނެވެ.
ޓައިވާން ކަނޑު އޮޅިއަކީ ޒަމާނުއްސުރެ ޗައިނާއިން އެގައުމުގެ އެކްސްކްލޫސިވް އިކޮނޮމިކް ޒޯން (އީއީޒެޑް) ގެ ބައެއްގެ ގޮތުގައި ބެއިޖިން އިން ބުނަމުން އަންނަ ސަރަހައްދެކެވެ.
ޗައިނާގެ ހާރިޖީ ވުޒާރާގެ ތަރުޖަމާނު ވަންގް ވެންބިން މި ހަފުތާގައި ވިދާޅުވީ ޓައިވާންގެ މައްސަލަ އޮޅުވާލުމުގެ ގޮތުން ޓައިވާން ކަނޑު އޮޅިވެސް ބައިނަލްއަގްވާމީ ސަރަހައްދެއްކަމަށް ބުނަމުން ދަނީ ޗައިނާގެ ސިޔާދަތަށް ނުރައްކާ ކުރުމުގެ މަގްސަދުގައި ކަމަށެވެ.
ޓައިވާނަކީ 23 މިލިއަން މީހުން ދިރިއުޅޭ ޖަޒީރާ ޑިމޮކްރަސީއެއް އޮތް ސަރަހައްދެކެވެ. ޓައިވާން ދެކެނީ އެމީހުންނަށް މިނިވަންކަން ލިބެން ޖެހޭނެ ކަމަށެވެ. ނަމަވެސް ޗައިނާގެ ރައީސް ޝީ ޖިންޕިން ދާދި ފަހުން ސޮއިކުރެއްވި ގާނޫނެއްގެ ދަށުން ޗައިނާއަށް "ސްޕެޝަލް މިލިޓަރީ އޮޕަރޭޝަންސް" އިރުމަތީ ކަނޑާއި ދެކުނު ޗައިނާ ކަނޑުގެ ސަރަހައްދުގައި ކުރިއަށް ގެންދިއުމަށް ބާރު ލިބިގެން ވެއެވެ. މިއީ ބެއިޖިންއިން ގެންގުޅޭ އަސްކަރީ ހަރުކަށި ސިޔާސަތު ގާނޫނީ އިމުގެ ތެރޭން ގެން ދިއުމަށް ލިބޭ ބާރެކެވެ.
މިއީ ރަޝިޔާގެ ޕޫޓިން ޔުކްރެއިންއާ މެދުވެސް އަމަލު ކުރެއްވި ގޮތެވެ.
ޗައިނާގެ ޚާރިޖިއްޔާގެ ތަރުޖަމާން ވެންބިން ވިދާޅުވެފައި ވަނީ ޓައިވާން ކަނޑު އޮޅިއަށް ޗައިނާގެ އިސްތިގްލާލު އޮތް ކަމަށް ވިދާޅުވެފައެވެ.
"ޓައިވާނާ ގުޅުން ހުރި މައްސަލަތައް އޮޅުވާލައި، ޗައިނާގެ ސިޔާދަތާއި ސަލާމަތަށް ނުރައްކާކުރުމުގެ ސަބަބެއް ހޯދުމުގެ ބޭނުމުގައި ބައެއް ގައުމުތަކުން ޓައިވާން ސްޓްރެއިޓް 'ބައިނަލްއަގުވާމީ ކަނޑުގެ ސަރަހައްދު' އޭ ކިޔާފައި ގޮވާލުމަކީ ދޮގު ދަޢުވާއެއް" އޭނާ ވިދާޅުވިއެވެ.
ޖަނޑުތަކާ ބެހޭ ބައިނަލްއަގްވޗާމީ މުއާހަދާގައި ހުރިހާ ޤައުމަކަށްވެސް، އައްސޭރިފަށުން ފެށިގެން 22 ކިލޯމީޓަރު ގެ ދިގު ސަރަޙައްދެއް، އެގައުމުގެ އިސްތިގްލާލުގެ ތެރޭގައި ހިމެނޭ ސަރަޙައްދެއްގެ ގޮތުގައި ލިބި ދެއެވެ. އަދި 370 ކިލޯމީޓަރަށް އެކްސްކްލޫސިވް އިކޮނޮމިކް ޒޯނެއްގެ ގޮތުގައި ކޮންމެ ގައުމަކަށްވެސް ދައުވާ ކުރެވިދާނެއެވެ.
ޓައިވާން ސްޓްރެއިޓް އަކީ ޗައިނާއާ 160 ކިލޯމީޓަރު ދުރުގައި އޮންނަ ކަނޑު އޮޅިއެކެވެ.
