ދުނިޔޭގެ ޔޯގާ ދުވަހުގެ މުނާސަބާގައި އދގައި ބާއްވާފައިވާ ހަރަކާތްތައް އިސްވެ ހުންނަވައިގެން ކުރިއަށް ގެންދެވީ އދގެ 76ވަނަ އާންމު މަޖިލީހުގެ ރައީސް އަދި ރާއްޖޭގެ ޚާރިޖީ ވަޒީރު، އަބްދުﷲ ޝާހިދުއެވެ.
ދުވަހުގެ ޝިއާރު ކަމަށްވާ "ޔޯގާ ފޯ ހިއުމެނިޓީ" ޝިއާރުގެ ދަށުން މިއަދު ފާހަގަ ކޮށްފައިވަނީ ބައިނަލްއަގުވާމީ އަށް ވަނަ ޔޯގާ ދުވަހެވެ.
ޢަބްދުﷲ ޝާހިދު ވިދާޅުވީ މި ދުވަސް ފާހަގަ ކުރުމަކީ ކޮރޯނާގެ ސަބަބުން ދިމާވެފައިވާ ކަންބޮޑުވުމާއި ޑިޕްރެޝަންގެ މައްސަލަތައް ބޮޑު މި ދަނޑިވަޅުގައި ފާހަގަ ކުރަން ނުހަނު މުނާސަބު ދުވަހެއް ކަމަށެވެ.
ދުނިޔޭގެ ޞިއްޙަތު ޖަމްޢިއްޔާއިން ނެރެފައިވާ ދުނިޔޭގެ ނަފްސާނީ ދުޅަހެޔޮކަމުގެ ރިޕޯޓުގައި ބުނެފައި ވަނީ، ދުނިޔޭގެ އެކި ކަންކޮޅުތަކުގައި ބިލިއަނެއްހައި މީހުން ވަނީ ކޮރޯނާގެ ފުރަބަންދާއި ހިތްދަތި ކަމުގެ ސަބަބުން ނަފްސާނީ ބަލީގެ ޝިކާރައަކަށްވެފައިކަމަށެވެ. އަދި އެރިޕޯޓްގައި ފާހަގަ ކޮށްފައި ވަނީ ފުރާވަރަށް އަރާ ކުދިނގެ ތެރޭން ކޮންމެ ހަތް ކުދިންގެ ތެރޭން އެކަކަކީ ނަފްސާނީ ބަލީގެ ޝިކާރައަކަށްވެފައިވާ މީހެއްކަމަށެވެ.
ބައިނަލްއަގްވާމީ ޔޯގާ ދުވަސް ފާހަގަ ކުރުމަށް ދުނިޔޭގެ ސިއްހަތު ޖަމިއްޔާއާއި މެމްބަރު ގައުމުތަކުން އިސްނަގައިގެން ޔޯގާގެ ޖިސްމާނީ އަދި ނަފްސާނީ ދުޅަހެޔޮކަމާއި، އުމުރު ދުވަހުގެ ދުޅަހެޔޮކަމަށް ދުނިޔޭގެ ފެންވަރުގައި މަސައްކަތްތަކެއް ކުރެއެވެ. ދުނިޔޭގެ ސިއްޙަތު ޖަމުއިއްޔާއިން ބާރު އަޅަނީ ގަވާއިދުން ޔޯގާ ޕްރެކްޓިސް ކުރުމުން ހުރިހާ އުމުރެއްގެ މީހުންނަށް އެކަށީގެންވާ ޖިސްމާނީ ހަރަކާތެއް ހާސިލުކުރުމަށް އެހީތެރިވެދޭނެ ކަމެކެވެ.
ޔޯގާގެ ސަބަބުން ނަފްސާނީ އަސަރުތައް ކުޑަވެ، ކަންބޮޑުވުމާއި ސްޓްރެސް ކުޑަވެ، ނަފުސާނީ އަދި އިޖުތިމާއީ ދުޅަހެޔޮކަމުގެ އިހުސާސްތައް އިތުރުވާކަން ވަނީ ހާމަވެފަ އެވެ.
ކޮވިޑް-19 ގެ އާލަމީ ވަބާގައި ހުރިހާ ގައުމެއްގެ އެތައް މިލިއަން ބަޔަކަށް ދުޅަހެޔޮ ސިއްހަތެއްގައި ހުރުމަށް އަދި ރަނގަޅު ސިއްހަތެއްގައި ތިބުމަށް ޔޯގާގެ ސަބަބުން އެހީތެރިވެދީފައިވާ ކަމަށާއި ޔޯގާ އަކީ މުޅި އިންސާނިއްޔަތަށް ހާއްސަ ކަމެއް ކަން ފާހަގަކޮށް، މިއަހަރުގެ ޔޯގާ ދުވަހުގެ ޝިއާރަކީ "ޔޯގާ ފޯރ ހިއުމެނިޓީ" އެވެ.
ޔޯގާއަކީ ހަމައެކަނި ފުޅާ ދާއިރާއެއްގައި އަދި އާންމުވެފައިވާ ކަސްރަތެއް ނޫނެވެ. ނަމަވެސް ޔޯގާއަކީ މީހުންގެ މެދުގައި މަގްބޫލު ހަރަކާތެކެވެ. ޔޯގާގެ ހަރަކާތްތައް ބައިނަލްލއަގްވާމީ ފެންވަރެއްގައި ހިންގުމަށް 2014 ވަނަ އަހަރު އ.ދ.ގެ ޢާންމު މަޖިލީހުގައި ފާސްކުރި ގަރާރަށް 177 ވޯޓު ލިބިގެން ދިއުމުން ޔޯގާގެ މަގްބޫލުކަން ހާމަވެގެންދިޔައެވެ.
