ޕާކސްތާންގައި މިފަހަކަށް އައިސް އެންމެ ނުރައްކާތެރި ގޮތަކަށް އިންސާނީ ހައްގުތަކަށް އަރައިގެންފައިވަނީ އިމްރާން ޚާންގެ ވެރިކަމުގައި ކަމަށް ޕާކިސްތާނު މީޑިއާއިން ރިޕޯޓް ކުރެއެވެ.
ޖަސްޓް އާރތް ނިއުސްއިން ރިޕޯޓް ކޮށްފައިވާ ގޮތުގައި ޖެނެރަލް ޕަރްވޭޒް މުޝައްރަފަށްފަހު، އިމްރާން ޚާންއަކީ، ޕާކިސްތާނުގައި މީޑިއާއާއި އިންސާނީ ހައްގުތަކަށް މަސައްކަތްކުރާ ޖަމާއަތްތަކާއި، ސޯޝަލް މީޑިއާ އެކްޓިވިސްޓުން ކޮންޓްރޯލު ކުރައްވައި އިންސާނީ ހައްގުތަކަށް އަރައިގަތުމުގެ އެންމެ މަޝްހޫރު ޖަރީމާތައް ހިންގި ސަރުކާރެވެ.
ޖަސްޓް އާތުން ރިޕޯޓްކޮށްފައިވާ ގޮތުގައި ޚިޔާލުތަފާތުވާ މީހުން މެރުމާއި، ނޫސްވެރިންގެ ގަޔަށް ބަޑިޖެހުމާއި، މިނިވަން ޚިޔާލު ފާޅުކުރުމަށް ހަމަލާދިނުން އާދައިގެ ކަމަކަށް ވެގެން ދިޔައީ އިމްރާން ޚާންގެ ވެރިކަމުގައެވެ. މި އަހަރުގެ ކުރީކޮޅު ޕާކިސްތާނުގެ ހިއުމަން ރައިޓްސް ކޮމިޝަނުން ނެރުނު 'ސްޓޭޓަސް އޮފް ހިއުމަން ރައިޓްސް ރިޕޯޓް 2021' ގައި ބުނެފައި ވަނީ އެ އަހަރު އެންމެ ބޮޑު ގެއްލުމެއް ލިބިފައިވަނީ ހިޔާލު ފާޅުކުރުމުގެ މިނިވަންކަމުގެ ހައްގުތަކަށް ކަމަށެވެ.
