ދާދި ފަހުން ފިރިހެނުންގެ ގްރޫޕަކުން ރެސްޓޯރަންޓެއްގެ ބޭރުގައި ހަތަރު އަންހެނަކާއެކު މާރާމާރީ ހިންގައި އަނިޔާކުރުމުން ޗައިނާގެ ސިޓީއެއް ކަމަށްވާ ޓަންގްޝާންއަށް ދީފައިވާ އޮނަރަރީ "ތަހުޒީބީ ސިޓީ" ގެ ދަރަޖަ ނިގުޅައިގެންފިއެވެ.
އަންހެނުންނަށް ކުރާ އަނިޔާގެ ސަބަބުން އާންމުން ރުޅިގަދަވެގެން ފށޑު ކިޔާފައި ވެއެވެ. ޖޫން މަހުގެ 10 ވަނަ ދުވަހު ބާބެކިއު ރެސްޓޯރެންޓްގެ ކެމެރާތަކުގެ ފުޓޭޖްތަކުން ފެންނަ ގޮތުގައި ފިރިހެނަކު އަންހެނަކާ ބެހެން އުޅުމުން އެމީހާ އެކަމާ ދެކޮޅު ހެއްޖެވެ. އަދި ރުޅިގަދަވެގެން އަންހެން މީހާގެ އިސްތަށިގަނޑަށް ދަމައިގެން އޭނާ ބިންމަތީގައި ކޫއްތާފައި ވެއެވެ. އެއަށްފަހު އެހެން ފިރިހެނުންތަކެއް އެއަންހެން މީހާގެ އެކުވެރިންނަށް އަނިޔާކޮށް، ތަޅައި އަނިޔާކުރާ މަންޒަރުވެސް ފެނުފައި ވެއެވެ.
މި އަނިޔާގެ ސަބަބުން އޭގެ ތެރެއިން ދެ އަންހެނަކު އަދިވެސް އޮތީ އައިސީޔޫގައި ހޮސްޕިޓަލްގައި އެޑްމިޓްކޮށްފައި ކަމަށް އޮފިޝަލުން ބުނެއެވެ. މިހާތަނަށް އެ ހަމަލާއާ ގުޅިގެން ނުވަ މީހަކު ހައްޔަރުކޮށްފައިވާ ކަމަށް ކަމާބެހޭ އިދާރާތަކުން ވަނީ ބުނެފަ އެވެ.ޗައިނާގެ ސެންޓްރަލް ކޮމިއުނިސްޓް ޕާޓީގެ ސިވިލައިޒޭޝަން ކޮމިޓީގެ އޮފީހުން ވަނީ ޗަންގްޝާން ސިޓީއަށް ދީފައިވާ "ތަހުޒީބު ސިޓީތަކުގެ" އޮނަރަރީ ލިސްޓުން އެސިޓީ އުނިކޮށްފަ އެވެ.އެ އޮފީހުގެ ރަސްމީ ވެބްސައިޓުގައި ވާގޮތުން "ގައުމީ ތަހުޒީބު ސިޓީތައް" ހޮވަނީ އިޖުތިމާއީ ރަނގަޅު ތަރުބިއްޔަތަކާއި ދުޅަހެޔޮ އަދި ކުރިއަރަމުން އަންނަ އިޖުތިމާއީ މާހައުލެއް ހިމެނޭ ގޮތަށް އަށް މިންގަނޑެއްގެ މައްޗަށް ބިނާކޮށް ކަމަށެވެ.ޓަންގްޝަން އަށް 2011 ވަނަ އަހަރުން ފެށިގެން މިހާތަނަށް ހަތަރު ފަހަރެއްގެ މަތިން މި ދަރަޖަ ދީފައިވެއެވެ. އެންމެ ފަހުން މި ދަރަޖަ ދީފައިވަނީ 2020 ވަނަ އަހަރު އެވެ.
