ސްރީލަންކާއަށް 3.5 ބިލިއަނަށްވުރެ ގިނަ އެމެރިކާ ޑޮލަރުގެ އިޤްތިޞާދީ، މާލީ އަދި އިންސާނީ އެހީ އިންޑިއާއިން ފޯރިކޮށްދީފައި ވަނީ ނިއުދިއްލީގެ "ނެއިބަރހުޑް ފަސްޓް" ސިޔާސަތުގެ ދަށުން ކަމަށް އިންޑިއާގެ ފޮރިން ސެކްރެޓެރީ ވިނޭ ކްވަޓްރާ ވިދާޅުވެއެވެ. އިންޑިއާގެ ޚާރިޖީ ވުޒާރާގެ މަތީ ފެންވަރުގެ ވަފްދެއް ވަނީ ސްރީލަންކާއަށް ޒިޔާރަތް ކުރައްވާފައވެ.
މި ވަފުދުގެ ދަތުރުފުޅުގައި ސްރީލަންކާގެ ރައީސް ގޯޓާބަޔަ ރާޖަޕަކްސައާއި ބޮޑުވަޒީރު ރަނިލް ވިކްރަމަސިންހައާއެކު ބައްދަލުވުންތަކެއް ވަނީ ބާއްވާފައެވެ. ދެ ފަރާތުގެ ދެމެދުގައި މަޝްވަރާތައް ކުރިއަށް ގެންގޮސްފައިވަނީ ބިނާކުރަނިވި ގޮތަކަށް ކަމަށް ކޮލަމްބޯގައި ހުންނަ އިންޑިއާ ހައިކޮމިޝަނުން ނެރުނު ބަޔާނެއްގައި ބުނެފައި ވެއެވެ.ސްރީލަންކާގެ މިހާރުގެ އިޤްތިޞާދީ ޙާލަތާއި، އިންޑިއާއިން މިހާރު ދެމުންދާ އެއްބާރުލުމާ ބެހޭގޮތުން ދެފަރާތުންވެސް ވަނީ ބިނަކުރަނިވޮ ގޮތަކަށް ޚިޔާލު ބަދަލުކުރައްވާފައެވެ.
ބޮޑުވަޒީރު ރަނިލް ވިކްރަމަސިންހައާއެކު ބޭއްވެވި ބައްދަލުކުރެއްވުމުގައި، ސްރީލަންކާގެ އިޤްތިޞާދާ ބެހޭގޮތުންނާއި، އިޤްތިޞާދު ރަނގަޅު ކުރެއްވުމަށް ސްރީލަންކާ ސަރުކާރުން ކުރައްވަމުން ގެންދަވާ މަސައްކަތްތަކާ ބެހޭގޮތުން މައުލޫމަތު ދެއްވިއެވެ.
