ތުރުކީގެ ރައީސް ރަޖަބް ތައްޔިބު އުރުދުޣާންއަށް އިންތިޚާބު ކާމިޔާބު ކުރެވިދާނެ ކަމާމެދު ސުއާލު އުފެދެއެވެ. ތުރުކީގައި އިންފްލޭޝަން މަތިވެ، ޑޮލަރުގެ ނިސްބަތުން ތުރުކީގެ ލިރގެ އަގު ހުއްޓުމެއް ނެތި ވެއްޓެމުން ދެއެވެ. އަދި ތަކެތީގެ އަގުތައްވެސް އިންތިހާއަށް ބޮޑު ވަމުން ކާބޯތަކެއްޗާއި، ބޭސްފަރުވާއާއި، ހަކަތައާއި، އެނޫންވެސް ޒަރޫރީ ބޭނުންތަކުގެ ހޭދަ މަތިވުމުގެ ސަބަބުން، ތުރުކީގެ އެތައް މިލިއަން ރައްޔިތުންނެއް ފަގީރުކަމަށް ވެށްޓެން ކައިރިވެފައިވާ ކަމަށް ޕޮލިސީ ރިސާޗް ގްރޫޕުން ރިޕޯޓް ކުރެއެވެ.
ތުރުކީވިލާތުގެ މަރުކަޒީ ބޭންކުން މިދިޔަ މާލީ އަހަރު "ސޭވް ލިރާ" ގެ ކެމްޕެއިނެއް ހިންގައި 128 ބިލިއަން ޑޮލަރު ވިއްކާފައި ވެއެވެ. ނަމަވެސް އޭގެ ސަބަބުން ލީރާގެ އަގު ހިފެހެއްޓުމުގެ ބަދަލުގައި ރިޒާވް ވަނީ ރެކޯޑް މިންވަރަކަށް 7.55 ބިލިއަން އެމެރިކާ ޑޮލަރަށް ދަށްވެފައެވެ.
އަންކާރާގައި އިންފްލޭޝަން މަތިވުމާ ގުޅިގެން، އިޤްތިޞާދު ފުޅާކުރުމަށް އެތައް ފަހަރެއްގެ މަތިން އިންޓްރެސްޓް ރޭޓް ދަށްކުރުމަށް މަސައްކަތް ކޮށްފައި ވެއެވެ. ނަމަވެސް، މި ފިޔަވަޅު ނިމުމަކަށް އައީ، ތެލުގެ އަގު ބޮޑު ވުމާ ގުޅިގެންނެވެ. 2021 ވަނަ އަހަރުގެ ނޮވެންބަރު މަހުން ފެށިގެން ޕެޓްރޯލްގެ އަގު ވަނީ 105 އިންސައްތައަށް ބޮޑު ވެގެން ގޮސްފައެވެ.
މީގެ އިތުރުން، ރައީސް އުރުދުޣާން ވަނީ ޔޫކްރެއިންއާއި ރަޝިޔާގެ ހަނގުރާމައިގައި އިސް ދައުރެއް އަދާކުރައްވާފައެވެ. ޔުކްރެއިންއަށް ޑްރޯން ވިއްކެވުމާއި ސުއިޑްން ފިންލެންޑު ނޭޓޯއަށް ވަނުމަށް ހުރަސް އެޅުއްވުމާއި ދެ ގައުމުގެ ހަނގުރާމަ ހުއްޓުމުގެ މަޝްވަރާތައް ބޭއްވުންފަދަ ކަންކަން ކުރިއަށް ގެނދަވާފައި ވެއެވެ.
ޕޮލިސީ ރިސާޗް ގްރޫޕް ޕޯރެގުން ބުނާ ގޮތުގައި ތުރުކީގެ އިންފްލޭޝަން ވަނީ 75 ޕަސަންޓް ގައި މައްޗަށް ގޮސްފައެވެ. މިއީ ޖީ 20ގެ ގައުމެއްގައި އެންމެ މައްޗަށް އިންފްލޭޝަން ދިއުމުގެ ރެކޯޑެކެވެ. ޔޫކްރެއިން ހަނގުރާމައިގެ ސަބަބުން ސަޕްލައި ޗެއިންއަށް ބުރޫއެރުމުން ތުރުކީވިލާތަށް ބޭނުންވާ ތެޔޮ އިމްޕޯޓް ކުރުން ގަޑުބަޑު ވެފައި ވެއެވެ.
ތުރުކީގެ ވަޒީފާ ނެތް މީހުންގެ ނިސްބަތްވެސް ވަނީ 22.9 ޕަސެންޓަށް އިތުރު ވެގެން ގޮސްފައެވެ.
މި ކަންކަމާއެކު ތުރުކީން މީޑިއާގެ މިނިވަންކަން ހަނިކުރުމާއި ޑިމޮކްރެސީއަށް ހުރަސްއެޅުމުގެ މަސައްކަތް ހިންގާފައިވާ ކަމަށްވެސް ޕޮލިސީ ރިސާޗް ގްރޫޕުން ބުނެއެވެ.
އުރުދުޣާން ސިފަކުރައްވަމުން ނޯމް ޗޮމްސްކީ ވިދާޅުވަނީ "އުރުދުޣާން މަސައްކަތް ކުރައްވަނީ ތުރުކީގައި ޑިމޮކްރަސީގެ ބާކީހުރި ސިފަތައް ހަލާކުކުރައްވާށެވެ. އުރުދުޣާން ދައްކަވަނީ އުސްމާނީ ޚަލީފާއެއްގެ ސިފައިގައި އުޘްމާނީ ދައުލަތް އާލާކުރައްވާށެވެ."
އުރުދުޣާންގެ އަދާލަތު ޕާޓީއަށް ވަނީ 25 އަހަރުގެ ތެރޭގައި ފުރަތަމަ ފަހަރަށް އިސްތަންބޫލާއި އަންކާރާގެ ކޮންޓްރޯލް ގެއްލިފައެވެ. އަދި މިދިޔަ ތިން އަހަރުގެ ތެރޭގައި އެންމެ ބޮޑު ހަ ސިޓީގެ ތެރެއިން ފަސް ސިޓީއެއްގައި އުރުދުޣާންގެ ޕާޓީއަށް ވަނީ ނާކާމިޔާބީއާ ކުރިމަތިލާން ޖެހިފައެވެ.
