ޖަރުމަނުވިލާތުގެ ދެކުނުގެ ބަވޭރިއާގައި ހުންނަ އެލްމާއޯ ގަނޑުވަރުގައި ޖީ7ގެ ގައުމުތަކުގެ އިސްވެރިންގެ މަހާސިންތާ ފަށައިފިއެވެ. ޖަރުމަން ޗާންސެލަރގެ ޚާއްސަ ދައުވަތަކަށް މިމަހާސިންތާގައި އިންޑިއާގެ ބޮޑު ވަޒީރު ނަރެންދްރަ މޮދީވެސް ބައިވެރިވެ ވަޑައިގަންނަވާނެއެވެ.
ސިނާއީ ގޮތުން އެންމެ ބޮޑު ހަތް ގައުމު (ޖަރުމަނުވިލާތް، ކެނެޑާ، ފަރަންސޭސިވިލާތް، އިޓަލީވިލާތް، ޖަޕާން، އިނގިރޭސިވިލާތް އަދި އެމެރިކާ) ގެ ލީޑަރުން ބައިވެރިވެވަޑައިގެން ބަވަރިއާގެ އެލްޕްސްގައި ކުރިއަށް ގެންދާ މި ސަމިޓްގެ ސަލާމަތީ ކަންކަން ބެލެހެއްޓުމަށް އެތައް ހާސް ފުލުހުން ނެއް ވަނީ ހަރަކާތްތެރިވެފައެވެ.
ސަމިޓް ފެށުމުގެ ގޮތުން އެމެރިކާގެ ރައީސް ޖޯ ބައިޑަން ވިދާޅުވީ ޔޫކްރެއިންގެ ވެރިރަށް ކިއޭވްއަށް ރަޝިޔާއިން މިސައިލް ހަމަލާތަކެއް ރެއާއި ދުވާލު ދެމުންގެންދާ ކަމަށާއި މިއީ ރަޝިޔާގެ ނާތަހުޒީބު އަމަލުގެ އެހެން މިސާލެއް ކަމަށެވެ.
މި ސަމިޓްގައި ޖަޕާނާއި އެމެރިކާއިން ވަނީ ރަޝިޔާގެ ރަން އެތެރެކުރުން ޖީ7ގެ ގައުމުތަކަށް އެތެރެ ކުރުން މަނާކުރުމަށް ރާވާފައިވާ ކަން އިޢްލާން ކޮށްފައެވެ.
އިންޑިއާގެ ބޮޑު ވަޒީރު ސަމިޓްގައި ވިދާޅުވިގޮތުގައި އިންޑިއާއިން މިނިވަން ކަމަށް 100 އަހަރު ފާހަގަ ކުރާއިރު އިންޑިއާގެ ތަރައްގީގެ 25 އަހަރުގެ ޕްލޭނެއް އޮންނާނީ ތަންފީޒު ކުރެވިފައެވެ. އިންޑިއާގެ ބައެއް ކާމިޔާބީތަކާ މެދު ވާހަކަ ދައްކަވަމުން އޭނާ ވިދާޅުވީ ދުނިޔޭގައި ހިނގަމުންދާ ޑިޖިޓަލް ޓްރާންސެކްޝަންގެ 40 ޕަސެންޓަކީ އިންޑިއާގައި ހިނގަމުންދާ މުއާމަލާތެއް ކަމަށެވެ. އަދި އިންޑިއާގެ އާބާދީގެ 90 ޕަސެންޓް މީހުންނަށް އެއްކޮށް ވެކްސިން ދެވިފައިވާނެ ކަމުގައިވެސް ވިދާޅުވިއެވެ.
