އީރާނުގެ ނިއުކްލިއަރ ސައިންޓިސްޓުން މަރާލުމަށް އެމެރިކާއާއި އިޒްރޭލުގެ ވާގިވެރިކަމާއެކު ދީފައިވާ ހަމަލާތަކުން މަރުވެފައިވާ ސައިންޓިސްޓުންގެ އާއިލާތަކަށް 4 ބިލިއަނަށްވުރެ ގިނަ އެމެރިކާ ޑޮލަރު ދިނުމަށް އީރާނުގެ ކޯޓަކުން ބުރާސްފަތި ދުވަހު އެމެރިކާ ސަރުކާރުގެ މައްޗަށް ހުކުމް ކޮށްފިއެވެ.
އީރާނުގެ ނިއުކްލިއަރ ޕްރޮގްރާމްގެ މައްސަލާގައި އީރާނާއި ހުޅަނގުގެ ގައުމުތަކާ ދެމެދު އުފެދިފައިވާ ނުތަނަވަސްކަން އިތުރުވަމުންދާކަން މި ރަމްޒީ ހުކުމުން ހާމަވެގެންދެއެވެ.
އީރާނުގެ ނިއުކްލިއަރ ސައިންޓިސްޓުންނަށް އަމާޒުކޮށް އިޒްރޭލުން މީގެ 10 ވަރަކަށް އަހަރު ކުރިން ދިން ޙަމަލާތަކެއްގައި އީރާނުގެ ނިއުކްލިޔަރ ސައިންޓިސްޓުން މަރާލިކަމުގެ ތުހުމަތު އިޒްރޭލުގެ ބޮލުގައި ތެހެރާނުން އަޅުވާފައިވީނަމަވެސް، އީރާނުން އިޒްރޭލުގެ މައްޗަށް ސީދާ ގޮތެއްގައި ތުހުމަތެއް ނުކުރެއެވެ. 1979 ވަނަ އަހަރު އީރާނަށް ގެނެވުނު އިސްލާމީ އިންގިލާބަށް ފަހު އީރާނުން އިޒްރޭލު ބަލައިގެންފައެއް ނުވެއެވެ.
ކޯޓުގެ ހުކުމްގައި އިޒްރޭލުގެ ވާހަކައަށް އިޝާރާތް ކުރީ އަނިޔާ ލިބުނު މީހުންނާ ދެކޮޅަށް އެމެރިކާއިން ހިންގި "އޯގަނައިޒްޑް ކްރައިމް" ގައި "ޒަޔަނިސްޓް ސަރުކާރަށް" އެމެރިކާއން ތާއީދު ކުރާ ކަމަށް ބުނެ އެކަންޏެވެ.
އެމެރިކާއާއި އީރާންގެ އިންޒާރުތައް އިންތިހާއަށް އިތުރުވެ، ފިއްތުންތައް އިންތިހާއަށް ބޮޑުވެފައިވާ މި ދަނޑިވަޅު، އެމެރކާއާ ދެކޮޅަށް މީގެ ކުރިން އީރާނުން ހުށަހެޅި އެތައް މައްސަލަތަކެކޭ އެއްފަދައިން، ކޯޓުގެ މި ޙުކުމް ތަންފީޒު ކުރާނީ ކިހިނެއްކަމެއް ސާފެއް ނުވެއެވެ. އިސްލާމިކް ރިޕަބްލިކް އޮފް އީރާންގައި ހިފަހައްޓާނެ އެމެރިކާގެ އެއްވެސް ހަރު މުދަލެއް ނެތެވެ.
