ޕާކސްތާންގައި ޓެރަރިސްޓް ހަމަލާތައް އިތުރުވަމުންދާ ކަމަށާއި އެކަމުގެ ސަބަބަކީ، ޕާކިސްތާނުން ޓެރަރިޒަމާ ދެކޮޅަށް ފާސްކޮށްފައިވާ އެކްޝަން ޕްލޭން އިމްރާން ޚާންގެ ސަރުކާރުން ތަންފީޒު ނުކުރުން ކމަށް ޕާކިސްތާންގެ ބޮޑު ވަޒީރު ޝާހްބާޒް ޝަރީފް ވިދާޅުވެއެވެ. އަދި ވެރިކަމަށް ވަޑައިގަތްފަހުން ޓެރިޒަމްގެ ހާލަތު ވަޒަން ކުރައްވަމުން ގެންދަވާ ކަމަށާއި އެކްޝަން ޕްލޭން ތަންފީޒު ކުރައްވާނެ ކަމަށެވެ.
ޕާކިސްތާން އިންސްޓިޓިއުޓް ފޮރ ކޮންފްލިކްޓް އެންޑް ސެކިއުރިޓީ ސްޓަޑީޒްއިން ބުނެފައި ވަނީ މިދިޔަ އަހަރު ޓެރަރިޒަމްގެ ހަރަކާތްތައް 56 އިންސައްތަ އިތުރުވެފައިވާ ކަމަށެވެ. އެފަރާތުނ ނެރެފައިވާ ރިޕޯޓުގައިވާ ގޮތުން 2021 ވަނަ އަހަރު ހަނގުރާމަވެރިން ވަނީ 294 ހަމަލާއެއް ދީ 388 މީހުން މަރާލައި އިތުރު 606 މީހުން ޒަހަމްކޮށްލައިފަ އެވެ.
ލާހޯރުގައި ބޭއްވި ބައްދަލުވުމެއްގެ ރިޔާސަތު ބެލެހެއްޓެވި ބޮޑުވަޒީރު ޝެހްބާޒް ވިދާޅުވީ ނެޝަނަލް އެކްޝަން ޕްލޭންގައި ބުނެފައިވާ ގޮތަށް ޕާކިސްތާންގެ ޕްރޮވިންސްތަކުގެ ދައުރު އަލުން އިއާދަކުރެވޭނެ އެވެ. އަދި މިދިޔަ ހަތަރު އަހަރު ޕްރޮވިންސްތަކުގެ ދައުރަށް އިހުމާލުވުމުގެ ސަބަބުން ޓެރަރިޒަމގެ އަމަލުތައް އިތުރުވެފައިވާ ކަމަށެވެ.
ޕާކިސްތާނުން ނޭޝަނަލް އެކްޝަން ޕްލޭން އެކުލަވަލީ، 2014 ވަނަ އަހަރުގެ ޑިސެމްބަރު މަހު އާމީ ޕަބްލިކް ސްކޫލަކަށް ދިން ޓެރަރިސްޓް ހަމަލާއެއްގައި 132އަށް ވުރެ ގިނަ ކުދިން މަރުވުމުންނެވެ.
އޭގެފަހުން، ޓެރަރިސްޓުންނާ ދެކޮޅަށް ރައްޔިތުން އެއްބައިވަންތަވެ، ހަފްތާއެއްގެ ތެރޭގައި ޕާކިސްތާނުގެ ދާޚިލީ ވުޒާރާއިންވަނީ، ޓެރަރިޒަމާއި ހައްދުފަހަނައަޅާ ދިއުން ހުއްޓުވުމަށް 20 ނުކުތާގެ މައްޗަށް އެކުލެވޭ ނޭޝަނަލް އެކްޝަން ޕްލޭނެއް އެތަކެއް ސްޓޭކް ހޯލްޑަރުންގެ މަޝްވަރާގެ މަތިން ފާސްކޮށްފައެވެ.
