އިންޑިއާގެ ވެރިކަން ކުރާ ނޭޝަނަލިސްޓް ބީޖޭޕީން އިންޑިއާގެ ރިޔާސީ ކެންޑިޑޭޓެއްގެ ގޮތުގައި ނޮމިނޭޓް ކޮށްފައި ވަނީ ގަބީލާ ސަރަހައްދުގައި ހަރަކާތްތެރިވި ސިޔާސީ އަންހެން އެކްޓިވިސްޓެކެވެ.
އުމުރުން 64 އަހަރުގެ ޑްރޫޕާޑީ މުރްމޫއަކީ އިރުމަތީ ސަރަހައްދުގެ އޮޑީޝާ ސްޓޭޓުގައި އިސް މަގާމުތަކެއް ފުރުއްވަމުން ގެންދަވާ ތަޖުރިބާކާރު ސިޔާސީ ބޭފުޅެކެވެ. ސިޔާސީ ތަޖުރިބާކާރުން ބުނާ ގޮތުގައި ބޮޑު ވަޒީރު މޯދީގެ ވެރިކަން ކުރާ ބީޖޭޕީއަށް ޕާލަމެންޓްގެ މެޖޯރިޓީ ލިބިފައި ވުމާއި އަދި ސްޓޭޓްތަކުގެ އެސެމްބްލީތަކުގައި ބީޖޭޕީއާއި އެހެން ޕާޓީތަކުގެ ތާއީދު ވެސް ލިބޭނެ ކަށަވަރުވާތީ މުރްމޫއަށް މަގާމަށް ބޭނުންވާ ވޯޓް ކާމިޔާބު ކުރެވޭނެ ކަމަށް ބެލެވެއެވެ.
ބީޖޭޕީއާއި އިދިކޮޅު ހުރިހައި ސިޔާސީ ޕާޓީތައް އެކުވެގެން ނޮމިނޭޓްކޮށްފައި ވަނީ ކުރީގެ މާލީ ވަޒީރު އަދި ފޮރިން މިނިސްޓަރު ޔަޝްވަންތު ސިންހައެވެ.
އިންޑިއާގެ ރައީސްކަމަށް ބޭފުޅަކު އިންތިޚާބު ކުރުމަށް ވޯޓު ދެއްވާނީ ގާނޫނު ހަދާ މަޖިލީސްތަކުގެ މެމްބަރުންނެވެ.
ރިޔާސީ އިންތިޚާބު އޮންނާނީ ޖުލައި މަހުއެވެ.
ސަންތަލް ގަބީލާ ދަރިކޮޅުގެ އާއިލާއަކަށް އުފަން މުރުމޫ އޭނާގެ ކެރިއަރު ފެށީ ސްކޫލް ޓީޗަރެއްގެ ގޮތުގައެވެ. އަދި އޭނާ ވަނީ ގަބީލާ މީހުންނަށް ހައްގުތައް ހޯދައިދީ އެމީހުން ބާރުވެރި ކުރުމުގައި އަމަލީ ގޮތުން ބައިވެރިވެވަޑައިގެން ފައެވެ. އޭގެ ފަހުން އޭނާ ވަނީ މެއިންސްޓްރީމް ޕޮލިޓިކްސްއާ ގުޅިވަޑައިގެން، ޖާރްކަންދު ސްޓޭޓްގެ ގާނޫނު ހަދާ މަޖިލީހުގެ މެމްބަރުކަމާއި އަދި ފަހުން އެސްޓޭޓްގެ ގަވަރުނަރުކަން ވެސް ކުރައްވައިފަ އެވެ.
މުރްމޫ އޭނާގެ ހަޔާތް ހާއްސަ ކުރައްވާފައި ވަނީ މުޖުތަމައަށް ޚިދުމަތް ކޮށްދިނުމަށާއި، ފަގީރުންނާއި ނިކަމެތިން ބާރުވެރިކުރުވުމަށް،" ކެންޑިޑޭޓެއްގެ ގޮތުގައި ނަން އިއުލާން ކުރެއްވުމަށް ފަހު އަންގާރަ ދުވަހުގެ ރޭ މޯދީ ކުރެއްވި ޓްވީޓެއްގައި ވިދާޅުވި އެވެ.
