ޗައިނާގެ ވެރިރަށް ބެއިޖިންގެ ކޮމިއުނިސްޓް ޕާޓީގެ ނޫހެއް ކަމަށްވާ ބެއިޖިން ޑެއިލީއިން މީގެ ކުރިން ރިޕޯޓުކޮށްފައިވާ ގޮތުގައި އެ ސިޓީގެ ޕާޓީގެ ރައީސް ކައި ކީ ވިދާޅުވީ ކުރިއަށް އޮތް ފަސް އަހަރު، ބެއިޖިން އިން ކޮވިޑް-19 ގެ ބަލިމަޑުކަން ކޮންޓްރޯލް ކުރުމަށް އަޅާފައިވާ ފިޔަވަޅުތައް ވަރަށް ސާބިތުކަމާއެކު ތަންފީޒު ކުރާނެއެވެ. އަދި ބޭރުން އިމްޕޯޓް ކުރާ ކޭސްތައް އައުން ހުއްޓުވުމަށާއި އެތެރޭގެ ކޭސްތައް އަލުން އާލާވިޔަ ނުދިނުމަށް ޗައިނާއިން 'ޒީރޯ-ކޮވިޑު' ސިޔާސަތު ދަމަހައްޓާނެ ކަމަށެވެ.
މިވާހަކަ އާންމު ވުމާ ގުޅިގެން މީސްމީޑިއާގައި މީހުން ވަނީ މިކަމަށް ފާޑު ކިޔަން ފަށާފައެވެ. އެއާއެކު ޗައިނާގެ ސެންސަރު ކުރާ ފަރާތްތަކުން ވަނީ "ޒީރޯ-ކޮވިޑު" ސިޔާސަތު ބެއިޖިންގައި "ކުރިއަށް އޮތް ފަސް އަހަރު" ދެމިއޮންނާނެ ކަމަށް ބުނާ ވާހަކަތައް މީސްމީޑިއާގައި ޑިލީޓް ކުރަން ފަށާފައެވެ.
ޗައިނާގެ ރައީސް ޝީ ޖިންޕިންގެ ގާތް އެކުވެރިއެއް ކަމަށްވާ ކައި ގެ މި ވާހަކަތަކަށް މީހުން ވަނީ ޗައިނާގެ ސޯޝަލް މީޑިއާގައި ވަރަށް ބޮޑަށް ރައްދުދީފައެވެ.
ފަހުން، ރައްދުގައި ބެއިޖިން ޑެއިލީއިން ވަނީ، ޕެންޑެމިކް ކޮންޓްރޯލްތަކާ ބެހޭ ގޮތުން ތަފްސީލު ކޮށްދެމުން އެއީ ރިޕޯޓް ކުރުމުގައި ދިމާވި މައްސަލައަކުން ވާހަކަތައް އޮޅުނީ ކަމަށް ބުނެފައެވެ.
